भांगरभूंय | प्रतिनिधी
करप्शन अबोलिशन पार्टीचे सदानंद वायंगणकार हांणी घेतलो आक्षेप
मडगांव, प्रतिनिधी : दक्षीण गोंय जिल्होधिकारी कार्यालयांत ईव्हीएम मशिनांत चिन्नां लोड करपाचें काम सुरू आसा. करप्शन अबोलिशन पार्टीचे सदानंद वायंगणकार हांणी मॅन्युएला बगर आनी योग्य पद्दत वापरिनासतना चिन्नां घालतात. वेंचणूक आयोगाचे नेम पाळिनात अशें सांगून हे प्रक्रिये आड आक्षेप नोंद केलो.
सासश्टी म्हालांतल्या चार विधानसभा मतदारसंघांतल्या ईव्हीएमांत चिन्नां लोडींग युनिटांत चिन्नां लोड करपाची प्रक्रिया आयतारा दिसभर चल्ली आनी रातचें उसरां मॉक पोलिंगची प्रक्रिया सोंपली. सासश्टीच्या उरिल्ल्या चार मतदारसंघांतल्या ईव्हीएमच्या युनिटांत उमेदवारांची चिन्नां लोड करपा खातीर सोमारा सकाळीं सुरवात जाली. करप्शन अबोलिशन पार्टीचे अध्यक्ष सदानंद वायंगणकार हे प्रतिनिधी म्हणून दक्षीण गोंय जिल्होधिकारी कार्यालयांत हाजीर आशिल्ले. तांणी सोमाराय चिन्नां लोडिंगाचें काम प्रक्रिये प्रमाण जायना. कामां करपाक जाय म्हणून करतात असो आरोप केलो. चिन्नां लोडिंगाचें काम सदोश जाल्यार फुडली प्रक्रिया योग्य कशी जातली अशें सांगून आक्षेप घेतला. वेंचणूक अधिकार्यांनी मॅन्युअलांतल्या मार्गदर्शक तत्वांक खरपणान पाळचीं असो आग्रो धरला.
जे कुडींत ईव्हीएमाचेर चिन्नां लोडींग करतात थंय गरजेच्या अभियंत्यां परस चड अभियंत्यांची हाजेरी आसा. अभियंतो, पुलीस अधिकारी आनी जिल्होधिकारीय मोबायल घेवन त्या सभाघरांत आयिल्ले, अशें वायंगणकार हांणी सांगून वेंचणूक आयोगाच्या सुचवण्यांचेर कोणूच लक्ष दिनात अशें तांणी म्हणलें.
युनिटांत चिन्नां लोड करपाक हेर खुबश्यो फायल्स आशिल्ले संगणक वापरतात. आदलीं चिन्नां डिलीट कशीं करतात, कितलीं चिन्नां एकाच वेळार रावपाक शकतात, ताची तांक कितले हे विशीं अभियंत्यांक ज्ञान ना. चिन्नां अपलोडाचें मॅन्युएल उपलब्ध ना, प्रक्रिया पुराय जाले उपरांत लेखी कांयच दिवंक ना, मोबायल कुडींत हाडटात आनी वेंचणूक आयोगाच्या निर्देश पाळिनात अशें वायंगणकार हांणी म्हणीत आक्षेप घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
