भांगरभूंय | प्रतिनिधी
पणजी: सक्तवसुली संचालनालयाचो (ईडी) अधिकारी आशिल्ल्याचें भासेवन एका मनशाक 45 लाख रुपयांक तोपी घाली. ह्या प्रकरणांत गोंय पुलिसांच्या सायबर गुन्यांव फांट्यान मुखेल सुत्रधार हॉटेल वेवसायीक विवेक गौतम (32, मूळ उत्तर प्रदेश) हाका अटक केल्या.
सायबर विभागान दिल्ले म्हायती प्रमाण ह्या प्रकरणांत दक्षीण गोंयच्या पिडीत मनशान सायबर फांट्यांत कागाळ दाखल केल्या. ते प्रमाण ताका 11 एप्रील 2024 दिसा सकाळीं 9.30 वरांचेर अनवळखी मनशान पयली भारतीय दूरसंचार नियामक प्राधिकरणाचो (ट्राय) अधिकारी आसा अशें सांगून संपर्क सादलो. ताणें कागाळदाराच्या आधार कार्डा वरवीं मनी लाँड्रिगेचे वेव्हार जाल्ल्याचें सांगलें. उपरांत संबंदीत टोळयेंतल्या मनशान आरमबाग पुलीस अधिकारी आनी सक्तवसुली संचालनालयाच्या (ईडी) अधिकारी आशिल्ल्याचें भासोवन कागाळदाराक ईडीचें बनावट वॉरन्ट जारी केलें. उपरांत हें प्रकरण मिटोवपा खातीर विवीध बँक खात्यांत पयशे भरपाक भाग पाडलें. ते प्रमाण कागाळदारान सांगिल्लें प्रमाण 45 लाख रुपया भरिल्ल्याचें कागाळींत नमूद केलां.
ह्या कागाळीची दखल घेवन सायबर फांट्याचे पुलीस निरिक्षक दीपक पेडणेंकार हांणी अनवळख्या आड भादंसंच्या कलम 419, 420 आनी आरडब्ल्यू 34 आनी म्हायती आनी तंत्रज्ञान कायद्याचें कलम 66 डी खाला गुन्यांव दाखल केला.
सायबर फांट्यान वयली रक्कम जमा केल्ल्या बँक खात्याची म्हायती मेळयली तेन्ना सदर रकमेंतले पांच लाख रुपया शिवोली हांगासरल्या निखील माने हाणें काडिल्ल्याचें मुखार आयलें. उपरांत ताची चवकशी केली तेन्ना ताणें हें प्रकरण मुखेल सुत्रधार हॉटेल वेवसायीक विवेक गौतम (32, मूळ उत्तर प्रदेश) हाची म्हायती दिली.
ते प्रमाण सायबर फांट्यान दुबावीत गौतम हाका 19 जुलय दिसा अटक केली. ताची चवकशी केली तेन्ना तो सुमार 20 बँक खातीं वापरीत आशिल्ल्याची म्हायती मुखार आयली. ताचे कडल्यान विभागान दोन मोबायल तशेंच विवीध बँक खात्यांतले धनादेश जप्त केले. उपरांत दुबावितान काणकोण पयलो वर्ग न्यायालयांत जामीन अर्ज दाखल केलो तेन्ना न्यायालयान दुबाविताक 24 वेर 15 हजार रुपया, 10 दीस सायबर फांट्यांत सकाळीं 10 ते दनपारां 2 वरां मजगतीं हजेरी लावप आनी हेर अटीचेर सशर्त जामीन मंजूर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
