भांगरभूंय | प्रतिनिधी
‘बर्च बाय रोमियो लेन’ उजो प्रकरण
पणजी: हडफड्यां ‘बर्च बाय रोमियो लेन’ ह्या आस्थापनांत फाटल्या वर्सा डिसेंबरांत उजो लागून 25 जाणांक लासून मरण आयिल्लें. ह्या प्रकरणांत सक्तवसुली संचालनालयान (ईडी) मेरशेच्या विशेश (पीएमएलए) न्यायालयांत 3,823 पानांचें आरोपपत्र दाखल केलां. हातूंत कथीत जमीन धनी सुरेंद्र कुमार खोसला हाचे सयत क्लबाचे धनी सौरभ लुथरा, गौरव लुथरा, अजय गुप्ता आनी बिईंग जीएस हॉस्पिटॅलिटी प्रा. लि. कंपनी आड आरोपपत्र दाखल केलां.
हडफड्यां बर्च क्लबाक 6 डिसेंबर दिसा लागिल्ल्या उज्यांत 25 जाणांक मरण आयिल्लें, जाल्यार स जाण जखमी जाल्ले. हे दुर्घटणे संबंदी हणजूण पुलिसांनी क्लबाचे धनी आनी हेरां आड गुन्यांव दाखल करून कारवाय केली. ह्याच वेळार दुर्घटणेची गोंय स्थीत मुंबय उच्च न्यायालयान स्वेच्छा दखल घेवन सुनावणी सुरू केली. मजगतीं बर्च बाय रोमियो लेनींत मनी लाँड्रिगेचो दुबाव उक्तावन मुळावी कारवाय सुरू केली.
क्लबान अग्नी सुरक्षा, हरकत ना प्रमाणपत्रां सयत हेर अनिवार्य परवानग्यो नासतनाय कामकाज सुरू दवरिल्लें. तशेंच मार्च 2024त वेपारी परवानो मुजतबाह्य जावन लेगीत तांणी आपलो वेवसाय चालूच दवरलो. अर्थीक वर्स 2023-24 ते 6 डिसेंबर 2025 ह्या काळांत ह्या आस्थापनान अदमाशेक 29.78 कोटी रुपयांचो महसूल मेळयिल्लो. ही रक्कम मनी लाँड्रींग कायद्या खाला गुन्यांवांतल्यान मेळिल्ली संपत्ती म्हणून निश्चीत केली.
बर्च दुर्घटणेंतले दुबावीत लुथरा भाव, जोडधनी अजय गुप्ता, बडतर्फ पंचायत सचीव रघुवीर बागकार आनी आदले सरपंच रोशन रेडकार हांचे सयत हेर दुबावितांची ईडीन मनीस लाँड्रींग प्रकरणांत जबाब नोंद केल्यात. तेप्रमाण ईडीन वेगळ्या वेगळ्या सुवातांनी धाडी घालून 29.05 कोटी रुपयांची मालमत्ता तात्पुरती जप्त केल्या. उपरांत ईडीन मेरशेच्या विशेश (पीएमएलए) न्यायालयांत 3,823 पानांचें आरोपपत्र दाखल केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
