भांगरभूंय | प्रतिनिधी
नोएडा, खबरां संस्था ः नोएडांत एक धक्को दिवपी घडणूक घडली. दादरी पुलीस स्टेशनाच्या वाठारांत आशिल्ल्या विद्यापिठाच्या यश मित्तल नांवाच्या विद्यार्थ्याची ताच्याच चार इश्टांनी हत्या केली. सोमार सावन तो बेपत्ता आशिल्लो. ते उपरांत ताचो बापूय दीपक मित्तल हाका स कोटी रुपया दी म्हूण संदेश येवपाक लागले. मित्तल हांणी पुलिशेंत कागाळ केली. तीग इश्टांक अटक केल्या, तर एकलो फरारी आसा.
मित्तल हांच्या कागाळी उपरांत पुलिसांनी विद्यापिठाच्या हॉस्टेलाचे सीसीटीव्ही फुटेज तपासले. तांतूत यश फोनाचेर उलयतना भायर सरतना दिसलो. उपरांत त्या वेळारचेर कॉल रेकॉर्ड पुलिसांनी तपासले तेन्ना यश रंचित नांवाच्या इश्टा कडेन उलयतालो अशें कळ्ळें. ह्या पुराव्याचेर आदारून पुलिसांनी रंचिताक ताब्यांत घेवन चवकशी सुरू केली. हें चवकशेंतल्यान पुलिसांक कळ्ळें की यश ताचे चार इश्टां सयत (रंचित, शिवम, सुशांत आनी शुभम) जायते फावटीं पार्टी करपाक वताले.
सोमारा (26 फेब्रुवारीक) यशाक पार्टीचो फोन आयलो. सगळे जाण विद्यापिठा पसून 100 किमी अंतराचेर आशिल्ल्या उत्तर प्रदेशांतल्या अमरोहाच्या शेतांत पार्टी करपाक गेले. पूण पार्टी वेळार कांय कारणांक लागून यश आनी ताच्या हेर इश्टां मदीं झगडीं जालीं. ह्या झगड्यांत हेर इश्टांनी मेळून यश मित्तलाची हत्या केली. ते उपरांत थंयच शेतांत ताची कुड पुरली. रंचितान सांगिल्ले सुवातेर यशाची पुरिल्ली कूड मेळ्ळ्या अशी म्हायती वरिश्ठ पुलीस निरिक्षक साद मियाँ खान हांणी दिली.
पुलिसांनी केल्ले चवकशेंत आरोपींनी सांगलें, हत्या केलें उपरांत यशाच्या कुटुंबांतल्या लोकांक दिशाभूल करपा खातीर वसुलीचे संदेश धाडलें. पुलिसांनी रंचिता सयत हेर दोगांक अटक केली. चवथो आरोपी शुभम फरारी आसा. ताचो सोद पुलीस घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
