भांगरभूंय | प्रतिनिधी
नवी दिल्ली, खबरां संस्था: इलेक्ट्रीक स्कुटर घेवपाची ही एक बरी संद. ३१ मार्च २०२४ मेरेन इलेक्ट्रीक स्कुटर घेतल्यार कितलेशेच हजार रुपयांची सवलत मेळटली. खरें म्हणल्यार मार्च उपरांत फास्टर ऍडॉप्शन आनी मॅन्युफॅक्चरिंग इलेक्ट्रीक व्हेईकल म्हळ्यार फेम २ येवजण सोंपतली. सरकारान ही मुजत वाडोवपाक न्हयकार दिला. पूण ताचे सुवातेर सरकारान इलेक्ट्रीक मोबिलिटी प्रमोशन येवजण (ईएमपीएस) सुरू करपाची घोशणा केल्या. ही येवजण १ एप्रील सावन लागू जातली आनी ती FAME 2 येवजणेचे सुवातेर येतली.
एप्रीलांत इलेक्ट्रीक गाडी घेतली जाल्यार सरकारा कडल्यान अनुदान मेळचें ना असो भंय जायत्या जाणांक आशिल्लो. मार्च उपरांत फेम २ अनुदानाचो लाव मेळचो ना हें खरें. पूण ईएमपीएस वरवीं तुमकां इलेक्ट्रीक दोन चाकी आनी तीन चाकी गाडयो खरेदी केल्यार अनुदान मेळूं येता.
हे नवे येवजणे खातीर उद्देग मंत्रालयान ५०० कोटी रुपया थारायल्यात. ही येवजण १ एप्रील सावन सुरू जातली आनी ती चार म्हयने वैद्य आसतली. इलेक्ट्रीक दुचाकी गाडी घेतल्यार सरकार १० हजार रुपया मेरेन अनुदान दितलें. मार्च उपरांत इलेक्ट्रीक स्कूटर वा इलेक्ट्रीक सायकल घेतल्यार दर किलोवॅट वराक (किलोवॅट) ५ हजार रुपया सकयल चडांत चड १० हजार रुपया अनुदान दितले.
इलेक्ट्रीक तीन चाकी वाहनां विशीं उलयतना सरकार इलेक्ट्रीक ऑटो रिक्शा घेतल्यार ५० हजार रुपया मेरेन अनुदान दितलें. हांगाय दर किलोवॅट वराक (किलोवॅट तास) ५ हजार रुपया अनुदानाचे नेम लागू जातले. FAME 2 खाला इलेक्ट्रीक दुचाकी वाहनांचेर २२,५०० रुपया मेरेन आनी इलेक्ट्रीक तीन चाकी वाहनांचेर १.११ लाख रुपया मेरेन अनुदान मेळटा.
सरकारी आंकडेवारी प्रमाण FAME 1 खाला सुमार २,७८,००० ईव्ही खरेदी करपा खातीर वट्ट ३४३ कोटी रुपया अनुदान खर्च जालां. दुसरे वटेन १० हजार कोटी रुपयांच्या अर्थसंकल्पान एप्रील २०१९ वर्सा FAME 2 येवजण सुरू जाल्ली. ही येवजण तीन वर्सां खातीर चालीक लायिल्ली जी मार्च २०२४ उपरांत सोंपतली. भारतांत इलेक्ट्रीक वाहनांची विक्री अंदूं ४५ टक्क्यां परस चड वाडल्या. सरकारान अनुदान उणें केल्या उपरांत लेगीत विक्रींत वाड नोंद जाल्या. २०२३ वर्सा सुमार १५ लाख ईव्ही नोंद जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
