भांगरभूंय | प्रतिनिधी
उल्हास तुयेंकार: कदंब म्हामंडळा कडेन बशींचो उणाव आशिल्ल्यान अडचण
मडगांव: कदंब म्हामंडळान हैदराबाद हांगासरल्या इलेक्ट्रा कंपनी कडेन कबलात केल्ली. ते प्रमाण 150 इलेक्ट्रीक बशी दिवपाचे आशिल्ले. कंपनीन फक्त 56 बशी दिल्यात. हेर बशी वेळार दिवंक नाशिल्ल्यान कंपनीक कारणा दाखय नोटीस धाडून दंड भरपाक सांगलां. तशेंच फुडल्या दोन म्हयन्यांत उरिल्ल्यो 94 बशी दिवपाचें कंपनीन मानून घेतलां अशी म्हायती कदंब म्हामंडळाचे अध्यक्ष आमदार उल्हास तुयेंकार हांणी दिली.
कदंब म्हामंडळाचे अध्यक्ष उल्हास तुयेंकार हांणी सांगलें, कदंब म्हामंडळाक 150 इलेक्ट्रीक बशीची पुरवण करपाचें कंत्राट हैदराबाद हांगासरल्या इलेक्ट्रा कंपनीक मेळिल्लें. कंपनी कडल्यान आतां मेरेन 56 इलेक्ट्रीक बशी कदंब म्हामंडळाक मेळ्ळ्यात. उरिल्ल्यो 94 इलेक्ट्रीक बशी पोरूं वर्सा मे म्हयन्या मेरेन दिवपाचे आशिल्ले. त्याे अजून लेगीत मेळिल्ल्यो नात. ताका लागून हैदराबादांतले ते कंपनीक कारणा दाखय नोटीस धाडून दिल्या. ते प्रमाण सुमार 1 कोटी दंड कंपनीन अदा करपाची गरज आशिल्ल्यान ते प्रमाण नोटीस धाडून दिल्या. कंपनी कडल्यान फुडल्या दोन म्हयन्यांत उरिल्ल्यो 94 इलेक्ट्रीक बशींची पुरवण करतले अशें सद्या सांगलां. कदंब म्हामंडळा कडेन अजून लेगीत खूबशा मार्गांचेर बशी सोडच्यो अशी मागणी जायत आसा. शाळा, कॉलेजी कडल्यान लेगीत जायत आसा. पूण सद्या बशींचो उणाव आसा.
तेच बरोबर नव्या कायद्या प्रमाण 15 वर्सां परस चड कालावधींतल्यो बशी कावलाक काडल्यात. ते खातीर सादारण 60 बशी कावलाक काडल्यात. हाका लागून खूबशे मार्ग बंद दवरल्यात अशी म्हायती आमदार उल्हास तुयेंकार हांणी दिली.
डिझलाचेर चलपी 50 बशी घेवपाक मंजुरी
मुख्यमंत्री डॉ. प्रमोद सावंत हांणी 50 डिझलाचेर चलपी बशी घेवपा खातीर मंजुरी दिल्या. पोरण्यो बशी आशिल्ल्यान मुंबय, हुबळी, पुणें अशा आंतरराज्य मार्गा वेल्यो बशी बंद दवरल्यात. नव्यो बशी आयले उपरांत ह्या आंतरराज्य मार्गांचेर बशी सुरळीत करतले. पूण हे खातीर फुडले दोन ते तीन म्हयने वाट पळोवची पडटली अशें आमदार उल्हास तुयेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
