भांगरभूंय | प्रतिनिधी
मडगांव, प्रतिनिधी : सर्वोच्च न्यायालयान इलेक्टोरल बॉण्ड ‘असंवैधानीक’ आशिल्ल्याचो निवाडो दिले उपरांतूय प्रधानमंत्री मोदी हांणी ताचेर उलोवप म्हळ्यार न्यायालयाचो आनी संविधानाचो अपमान, असो आरोप कॉंग्रेसीचे दक्षीण गोंय उमेदवार कॅ. विरियातो फर्नांडीस हांणी केला.
सीबीआय, आयटी आनी ईडी खाला तपास सुरू जाले उपरांत कांय कंपनींनी रोखडेंच इक्टोरल बॉण्डा वरवीं भाजपाक देणग्यो कित्याक दिल्यो, हें प्रधानमंत्री मोदी हांणी लोकांक स्पश्ट करचें अशें कॅ. फर्नांडीस हांणी म्हणलें. प्रधानमंत्री मोदी हांणी एके मुलाखती मजगतीं कांय टिप्पण्यो केल्यात. ताका लागून भाजपाची भांडवलदारवादी आनी गरीब विरोधी मानसिकताय परत मुखार आयिल्ल्याचो दावो फर्नांडीस हांणी केलो.
भाजपाक पारदर्शकताय दवरपाची आसली जाल्यार इलेक्टोरल बॉण्ड देणगीदारांची वळख कित्याक गुपीत दवरली? ज्या कंपनींनी आनी व्यक्तींनी फकत भाजपाक व्हडलो निधी दिला तांचीं नांवां जाहीर करपाचो भंय कित्याक दिसलो, असो प्रस्न फर्नांडीस हांणी केलो.
एसबीआय भारतांतली व्हडली बँक. तांणीय इलेक्टोरल बॉण्ड डेटा न्यायालयांत सादर करतना फटींगपणां केलीं. इलेक्टोरल बॉण्डची म्हायती दिवपाक जून मेरेनचो वेळ लागतलो अशें एसबीआयन न्यायालयांत सांगलें. मात मागणी भायर मारले उपरांत तीच म्हायती तीन दिसांनी अपलोड केल्ल्याचें कॅ. फर्नांडीस हांणी सांगलें.
भाजपाचीं फटींगपणां भारतीय जनतेक कळ्ळ्यां. मोदींची राजवट बेगीनूच सोंपतली. गोवा इंडी आघाडी सरकार स्थापन करपाक दोन जाग्यां सयत योगदान दितले, अशें कॅ. फर्नांडीस हांणी फुडें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
