भांगरभूंय | प्रतिनिधी
इंडियन प्रिमियर लीग म्हळ्यार संवसारांतली सगळ्यांत चड मोलाची लीग म्हणून वळखतात, त्या आयपीएलचो सोळावो हंगाम 31 मार्चा सावन सुरू जाला. अहमदाबादच्या नरेंद्र मोदी स्टेडियमाचेर एका अद्भूत सुवाळ्यांत ह्या हंगामाची सुरवात जाली. उक्तावण मॅच डिफेंडिंग चॅम्पियन गुजरात टायटन आनी चेन्नई सुपर किंग हांचे मदीं जाली. हे मॅचींत डिफेंडिंग चॅम्पियन गुजरातान चेन्नय आड पांच धांवड्यांनी जैत मेळयलें.
31 मार्चा सावन सुरू जाल्लो आयपीएलचो रोमांच फुडले दोन म्हयने चालू उरतलो म्हणून क्रिकेट मोगीं खातीर ही व्हडली मेजवानी आसा.
2020 वर्सा सावन कोरोना महामारीन संवसाराक घेरलां. हेर मळां प्रमाण खेळां मळाकूय कोरोनाचो धपको बसलो. आयपीएल सर्तूय ताका आडवाद ना. कोरोना उपरांत लेगीत बीसीसीआयन आयपीएल येसस्वीपणान घडोवन हाडलो. केन्ना देशांत आनी केन्ना परदेशांत आयपीएल मॅची जाताल्यो. 2020 वर्सा आयपीएल दोन टप्प्यांनी घडोवन हाडचो पडलो कारण जायत्या खेळगड्यांक कोरोनाची लागण जाल्ली. 2020 आनी 2021 वर्सा कोरोनाक लागून प्रेक्षकांक मैदानांत प्रवेश मेळूंक नाशिल्लो. देखून प्रेक्षकांक प्रत्यक्ष मळार बसून आयपीएलचो रोमांच अणभवूंक मेळनाशिल्लो. पूण फाटल्या वर्सा सावन प्रेक्षकांक परतून प्रत्यक्ष मळार बसून आयपीएलचो रोमांच अणभवपाक मेळ्ळो.
फाटल्या वर्सा गुजरात टायटन आनी लखनौ लायन्स अशे दोन नवे पंगड जोडले. दोनूय पंगडांनी पयलेच खेपे बरी कामगिरी केली. लखनवचो पंगड फायनल फोरांत पावलो जाल्यार गुजरात टायटनान आपले परीन यत्न करून पयल्याच यत्नांत तो चॅम्पियन जालो. हार्दिक पांड्यान गुजरात टायटन्स पंगडाचें तेजस्वी फुडारपण केलें. हे खेपेय हो पंगड खिताबा खातीर खर दावेदार आसा. पयलेच मॅचींत चेन्नयेक हारोवन तांणी ताची झलक दाखयल्या.
चेन्नय आनी मुंबय हेय दोन पंगड सदचे भशेन किताबा खातीर खर दावेदार आसात. आयपीएलाच्या इतिहासाचेर नदर मारल्यार आयपीएलाचेर ह्या दोनूय पंगडांचो शेक सदांच उरला. आयज मेरेन मुंबय पांच फावटीं आयपीएल जिखला जाल्यार चेन्नय चार फावटीं आयपीएल ट्रॉफी जिखल्या. कोलकाता आनी हैदराबादान अनुक्रमान दोन फावटीं हें किताब जिखल्यात. राजस्थान रॉयलान 2008 वर्सा पयलो आयपीएल जिखलो जाल्यार फाटल्या वर्सा गुजरातान जैत मेळयलें. अंदूं मुंबय, चेन्नय आनी गुजरात ह्या किताबा खातीर खर दावेदार आसले तरी कोलकाता आनी बेंगळुरू ह्या पंगडांचोय खेळ बरो चल्ला. तेय हो खिताब जिखूंक शकतात. फाटल्या वर्सा गुजरात हें किताब जिखतलें अशें कोणाकूच दिसलें ना, पूण गुजरात हो किताब जिखपाक येसस्वी जालें. कोण जाणां, आयपीलाक हे खेपेय नवो विजेतो मेळूं येता. आयपीएलाचें हेंच खाशेलपण जाका लागून आयपीएल ही संवसारांतली सगळ्यांत लोकप्रिय लीग जाल्या.
फाटल्या पंदरा वर्सां प्रमाण अंदूं आयपीएल सर्त खूबच लोकप्रीय जातली हातूंत दुबाव ना. आयज आयपीएल भारतांतच न्हय तर संवसारांतलो सगळ्यांत व्हडलो ब्रँड जाला. संवसारांतल्या सगळ्या देशांतले नामनेचे खेळगडे आयपीएलांत खेळटात. आयपीएलान क्रिकेट जगाक जायते दर्जेदार खेळगडे दिल्यात. भारतीय पंगडांतले सगळे खेळगडे आयपीएलाची देण. पयलीं रणजी मॅचींत बरे कामगिरी करपी खेळगड्यांक भारतीय पंगडांत प्रवेश मेळटालो पूण आतां आयपीएलांत बरे कामगिरी करपी खेळगड्यांक भारतीय पंगडांत प्रवेश मेळटा देखून सगळे खेळगडे मैदानाचेर जीव तोडून खेळटात. देशांतल्या परिस्थितीन गरीब आशिल्ल्या खेळगड्यांकूय आयपीएलान हात दिला. क्रिकेट गांवांनी पावोवपाक आनी तिचें आकर्शण निर्माण करपांत आयपीएल येसस्वी थारल्या हें न्हयकारूंक जावचें ना.
इंडियन प्रिमियर लीगाक ‘इन्क्रेडिबल प्रिमियर लीग’ अशेंय म्हण्टात, कारण खेळगडे मैदानाचेर घाम गळयतात, बरें खेळटात आनी राष्ट्रीय पंगडांत पावतात. सांगाता आपल्या फ्रॅंचायजी पंगडाक जैत मेळोवन दितात, तें जालेंच.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
