भांगरभूंय | प्रतिनिधी
पणजी : इनफ इज इनफचे बसकेची परवानगी वेळार फाटीं घेवपाच्या निर्णयाच्या आड आयज इनफ इज इनफची कोअर समिती बसका आपयल्या. बसकेंत आमी सभा ३० मेकूच घेवची, लोकभावनांचेर मोर्चा काडप वा आझाद मैदानाचेर शांतिकायेन आंदोलन करप, हाचे मदल्या खंयच्याय एका पर्यायाचो विचार करतात.हे विशींचो निमाणो निर्णय सांजेवेळार मेरेन कळयतले अशी म्हायती देविदास आमोणकार हांणी दिली. बुधवारा पणजे जाल्ले पत्रकार परिशदेंत ते उलयताले. ह्या वेळार एल्विस गोम्स आनी गोविंद शिरोडकार हाजीर आशिल्ले.
आमोणकार हांणी म्हणलें, महापालिकेन २१ मेक परवानगी दिल्ल्याचेर आमी पुलीस, जिल्लोधिकारी कार्यालय आनी हेर परवानेय घेतिल्ले. सभेचें पुर्वतयारी नियोजन जाल्लें. मात अचकीत २५ मेक महापालिकेन परवानगी फाटीं घेतली. ३० मेक आझाद मैदानार घटक राज्य दिसा निमतान प्रदर्शन भरतले अशें कारण महापालिकेन दिलां. महापालिकेक हे विशीं अदीक म्हायती नाशिल्ली काय, म्हायती आशिल्ली जाल्यार आमकां पयलींच परवानगी कित्याक दिली, हें स्पश्ट करचें.
तांणी म्हणलें, मदींच कांय दिसांनी इनफ इज इनफ हे चळवळीक राज्यभरांतल्यान फाटबळ मेळटा. चळवळीचे लोकप्रियतेक लागून राज्य सरकार उक्तें पडलें असो भंय तांकां दिसता. हे चळवळीक भियेवनूच सरकारान वेळार परवानगी फाटीं घेतल्या. आमी सरकाराचे हे कृतीचो निशेध करतात. गोंयांत जरी आतां पुर्तुगेज शासन नासलें तरी सध्याचें सरकार पुर्तुगेजां प्रमाणूच हुकुमशाय पद्धतीन वागता. परवानो फाटीं घेवपाची कृती पुरायेन लोकशाये आड आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
