भांगरभूंय | प्रतिनिधी
पणजी, प्रतिनिधीः संजीवनी साकर कारखान्यांत आरएफक्यू (रिक्वेस्ट फॉर कोटेशन) निविदेक आजून मेरेन तरी एकाय एजन्सीचो प्रतिसाद ना. सरकारान १८ जुनाक आरएफक्यू निविदा दुसरे खेपो जारी केल्या. आजून मेरेन एका एजन्सीन बोली सादर करूंक ना. आमदार दिगंबर कामत हांच्या लेखी प्रस्नाक शेतकी मंत्री रवी नायक हांणी ही लेखी जाप दिल्या.
कारखान्यांत साकरेचें उत्पादन परवड ना. हाका लागून इथेनॉल प्रकल्प घालपाचो प्रस्ताव आसा. पीपीपी तत्वाचेर इथेनॉल प्रकल्प सुरू करपाचे यत्न सुरू आसा. फाटले वर्सा सरकारान आरएफक्यू निविदा जारी केल्ली. हाका प्रतिसाद मेळ्ळो ना. हांचे उपरांत १८ जून २०२४ दीसा दुसरे खेपो आरएफक्यू निविदा जारी केली. म्हयनो जावन गेलो तरी आजून मेरेन निविदे खातीर एकूय अर्ज येवंक ना. संजीवनी साकर कारखानो सध्या बंद आसा. वेंचून आयिल्लो एकूय संचालक ना. संजीवनी साकर कारखान्यांचेर सध्या प्रशासक आसा. प्रशासकूच कारखान्यांचो वेवार पळयता. कारखान्यांत सध्या ९१ कायमस्वरूपी कामगार आसा. ७८ कंत्राटी कामगार आसा. १ कामगार दिसपट्या पगाराचेर आसा. कायमस्वरूपी तशेंच कंत्राटी कामगारांक सरकारांच्या निधीतल्यांन पगार सुरू आसा.
संजीवनी साकर कारखानो बंद जाले उपरांत म्हळ्यार २०१९ – २० अर्थिक वर्सा सावन सरकार उस शेतकारांक लुकसाण भरपाय तशेंच आधारभूत रक्कम दीत आसा. २०२३- २४ अर्थिक वर्सा ७.५ कोटी रूपया उस शेतकारांक लुकसाण भरपाये खातीर सरकारान दिल्ले आसा. २४०० रूपया प्रती मेट्रिक टन अशें पयशें शेतकारांक दिवपाचे आसा.
२०१९ – २० वर्सा सरकारान मेट्रिक टना फाटल्यान १२०० रूपया प्रमाण उस शेतकारांक पयशें फारीक केले. ज्या शेतकारांच्या उसाची कापणी जाली ना, तांका सरकारान ३६०० प्रती मेट्रिक टन अशी लुकसाण भरपाय दिली. संजीवनी साकर कारखान्याच्या पुनर्वसना खातीर सरकारान समिती स्थापन केल्ली.
संजीवनी साकर कारखान्यांत साकरेच्या बदला इथेनॉल तयार करपाचो प्रस्ताव आसा. हे विशीं पुणेच्या डेक्कन शुगर इन्स्टिट्यूटान अहवाल दिल्लो आसा. ह्या अहवाला उपरांत पीपीपी तत्वाचेर इथेनॉल प्रकल्प सुरू करपाचो प्रस्ताव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
