भांगरभूंय | प्रतिनिधी
मायणा कुडटरी पुलिसांची कारवाय
मडगांव : माकाझनच्यान बँके भायल्यान अशोक कुमार हांचें अपहरण करून, ताका जिवो मारपाची छमकी दिवन ३ लाख रुपया लुटयेंतल्या मुखेल सुत्रधाराक अटक करपाक मायणा पुलिसांक येस आयलां. निलेश भीमराव जाधव (५३, रा. अकोला, महाराष्ट्र) अशें दुबाविताचें नां. तांणी स्वताक अंमलबजावणी संचालनालयाचो अधिकारी आशिल्ल्याचें सांगून हो गुन्यांव केलो.
बोर्डा- फातोड्डेंचो अशोक कुमार (५६) हांणी हे विशीं कागाळ दाखल केल्ली. २४ मार्च २०२६ दिसा दनपरां २.३० वरांचेर माकाझन हांगच्या कॅनरा बँके भायल्यान निलेश जाधव, बलराम शेट्टी, अजित आनी हेर कांय वांगड्यांनी अशोक कुमार हांचें तांच्याच ह्युंडाई व्हेन्यू कारींतल्यान अपहरण केल्लें.
उपरांत दुबावितांनी कागाळदाराक कर्नाटकांतल्या कारवारा एके शांत सुवातेर व्हेलो. थंय ताका जिवो मारपाची धमकी दिली आनी भंय दाखोवन पयशांची मागणी केली. दुबावितान अशोक कुमार हांचे गाडयेंत आशिल्ले ३ लाख रुपया बळयां घेवन थंयच्यान पळ काडली.
ह्या गुन्यांवां आदीं पुलिसांनी अजित कुमार कट्टीमणी (32, रा. मडगांव) हाका अटक केल्ली. जो सध्या जामिनाचेर भायर आसाो मात मुखेल दुबावीत निलेश जाधव हो पुलिसांक धांवडायतालो.
मायणा कुडतरी पुलिसांनी तांत्रिक पाळत दवरली तेन्ना दुबावीत निलेश हो कर्नाटकाच्या दावणगगिरी हांगा आशिल्ल्याचें समजलें. तो दावणगिरी हांगच्यान बंगळुरूचे दिकेन पळून वचपाचे तयारेंत आसतना मायणा कुडतरी पुलीस पंगडान ताका धरलो. ताका गोंयांत हाडून २४ एप्रिलाक अटक केली.
दुबाविताक मडगांवच्या न्यायालयांत हजर केलें. न्यायालयान दुबावीत निलेश जाधवाक ६ दिसांची पुलीस बंदखण आयकयली. दक्षीण गोंय पुलीस अधीक्षक संतोष देसाय, पुलीस अधीक्षक सिद्धांत शिरोडकार आनी पुलीस निरीक्षक कपिल नायक हांच्या मार्गदर्शना खाला पीएसआय प्रफुल्ल गिरी, हवालदार गोरखनाथ गांवस, पुलीस कॉन्स्टेबल समीर सुधीर आनी चेतन कोळी हांणी ही कारवाय केली. ह्या प्रकरणाचो फुडलो तपास पुलीस उपनिरीक्षक प्रफुल्ल गिरी करतात.
#KidnappingNews #Goa #KarnatakaNews
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
