भांगरभूंय | प्रतिनिधी
विरेश बोरकारः गोंय राखपा खातीर घातिल्ल्यो अटी
भांगरभूंय । प्रतिनिधी
मडगांवः तीन अटी घालून इंडी आघाडेक चर्चेक येवपाचो आरजीपीन उलो मारिल्लो. पोगो बील, बिगर गोंयकारांच्यो झोपडपट्ट्यो काडप आनी म्हायद वाटावप ह्यो अटी गोंय राखपा खातीर आशिल्ल्यो. सरकारी जमनी, कोमुनिदादीच्यो जमनी हडप जाल्यात. मात काँग्रेस आनी ताच्या वांगडा आशिल्ल्या घटक पक्षांक गोंयचें कांयच पडिल्लें ना. गोंयकारांच्या हिताचे हे पक्ष न्हय. ताका लागून तांणी चर्चेक न्हयकार दिलो, अशें मत आमदार विरेश बोरकार हांणी उक्तायलें.
लोकसभा वेंचणुके खातीर दक्षीण गोंयांतल्यान रिव्होल्युशनरी गोवन्स पक्षा वतीन रुबर्ट परेरा हांणी उमेदवारी अर्ज दक्षीण गोंय जिल्होधिकारी तशेंच जिल्हो वेंचणूक अधिकारी अश्वीन चंद्रू ए. हांचे कडेन सादर केला. ह्या वेळार आरजीपी अध्यक्ष मनोज परब हांणी सांगलें, गोंयकारांचो आवाज संसदेंत पावोवचो ह्या उद्देशान गोंयांतली लोकसभा वेंचणूक लडोवपाचो निर्णय आरजीपी वतीन घेतला. गोंयच्या लोकांच्यो समस्या संसदेंत मांडपाक राष्ट्रीय पक्ष अपेशी थारल्यात. अजून लोकांच्यो समस्या सुटाव्यो जावंक नात. एसटी आरक्षम, म्हादय, कोळसो येरादारी, बेरोजगारी, जमनी सांबाळपाचो प्रस्न अजून कायम आसा. इतलीं वर्सां कमळ आनी हात हांचे मदीं लोकांची घुस्मट जाल्या. हे घुस्मटीक नवो पर्याय मेळचो हे खातीर आरजीपी मुखार सरल्या, अशें मनोज परब हांणी सांगलें.
लोकांक कितें जाय तें आरजीपीच्या उमेदवारांनी लोकां कडल्यान समजून घेतलां. आरजीपीन घराघरांनी वचून लोकांच्यो समस्या समजून घेतल्यात. गांवगिऱ्या वाठारांतल्या खाची कोनशांनीय आरजीपी भोंवल्या. उदक, वीज, रस्तो, कोळसो येरादारी, म्हादय न्हय, मरिना अशे विवीध विशय लोकांक सतायतात. गोंयकारांचें अस्तित्व तिगोवन दवरचे खातीर आरजीपी काम करता. खूब कडेन बेकायदो झोपडपट्टी निर्माण जाल्यात. संविधानान जे हक्क दिल्यात, ते प्रमाण आरजीपी गोंयच्या अस्तित्वा खातीर लडटा, अशें आमदार विरेश बोरकार हांणी सांगलें. म्हादय न्हंयेचो प्रवाह कायम दवरप, एसटी आरक्षणा खातीर लडो दिवप, तरणाट्यांक केंद्रीय नोकऱ्यो मेळच्यो हे खातीर काम करतले आनी हेच मुद्दे घेवन लोकां मेरेन गेल्यात, अशें दक्षीण गोंयचे लोकसभा उमेदवार रुबर्ट परेरा हांणी सांगलें.
दक्षिणेंतल्यान कालिदास वायंगणकार हांचो अर्ज
दक्षीण गोंय लोकसभा मतदारसंघांतल्यान सांकवाळ कुठ्ठाळीचे समाजीक वावुरपी कालिदास वायंगणकार हांणी अपक्ष उमेदवारी अर्ज दक्षीण गोंय जिल्हो वेंचणूक अधिकारी तशेंच जिल्होधिकारी अश्वीन चंद्रू ए. हांचे कडेन सादर केला. हे आदीं काँग्रेस उमेदवार कॅप्टन विरियातो फर्नांडीस, भाजप उमेदवार पल्लवी धेंपो आनी शिवसेनेचे आदले जिल्हो मुखेली अॅलेक्सी फर्नांडीस हांणी अर्ज सादर केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
