‘इंडी’तल्या घटक पक्षांचे कार्रेगाद हावेस !

भांगरभूंय | प्रतिनिधी

देशांत फाटलें सप्तक वेंचणूक जाहीरनाम्याचें आशिल्लें. काँग्रेस पक्षाच्या ‘न्यायपत्रा’न ह्या सप्तकाची सुरवात जाली आनी पयर आयतारा भारतीय जनता पक्षाच्या ‘मोदींची गॅरंटी’ ह्या संकल्पपत्रान ताचो समारोप जालो.

लोकसभा वेंचणुकेच्या पयल्या पांवड्या वेलें मतदान आतां फक्त तीन दिसांचेर येवन पावलां. सहाजिकूच सगले
कडेन वेंचणूक प्रचार तेंगशेक पावला. सादाराण 40 दिसां भितर वट्ट सात पांवड्यार मतदानाची प्रक्रिया पुराय जायत आशिल्ल्यान, सगले कडेन वेगळ्यावेगळ्या पांवड्यार प्रचाराक चड नेट येवंक लागला. गोंयांत सात मे दिसा मतदान जायत आशिल्ल्यान उमेदवारांची घोशणा उसरांच जाल्ली आसली तरी हांगाय प्रचाराक नेट चडूंक लागला. आतां वेंचणूक म्हणली की जाहीरनामे आयलेच. प्रत्यक्ष वेंचणुकां आदीं उण्यांत उणें सात ते आठ दिसा आदीं राजकीय पक्ष आपापले वेंचणूक जाहीरनामे घेवन मतदारां मुखार येतात आनी फुडल्या पांच वर्सांत आमी हे करतले ते करतले अशें सांगत मतदारांक फटोवपाचो यत्न करतात. सत्ताधीश भाजपा पसून कोणूय ताका आडवाद ना. भाजपाच्या राष्ट्रीय लोकशाय आघाडी कडेन धिटायेन दोन हात करपा खातीर मुखार आयिल्ल्या ‘इंडी’ आघाडी कडल्यान अशाच एका वेंचणूक जाहीरनाम्याची अपेक्षा देशांत सगलेच कडेन नरेंद्र मोदी हांचो विरोध करीत आसतना ह्या आघाडीतल्या घटक पक्षांनी वेंचणूक प्रक्रियेक सुरवात जावचे पयलींच वेंचणूक जाहीरनाम्यांच्या रुपान आपल्यो वेगळ्योवेगळ्यो चुली मांडिल्ल्याचें चित्र पळोवंक मेळ्ळें. लोकसभा वेंचणडूक ‘इंडी’ आघाडीक कौल दिलोच जाल्यार केंद्रांत मुखार कितें घडूंक शकता हाचो ट्रेलरूच कांय घटक पक्षांनी स्वतंत्रपणान मतदारां मुखार आपआपल्या जाहीरनाम्याच्या माध्यमांतल्यान मतदारां मुखार सादर केला अशेंय म्हणूंक येतलें.
‘इंडी’ आघाडीचें फुडारपण आयचे घटकेक काँग्रेस करता आसुये असो समज करून घेवपाक बरोच वाव आसा. कारण होच पक्ष सगल्यांत चड म्हणल्यार पावणेतिनशें ते तिनशें सुवातो लडयता. उपरांत समाजवादी, द्रमूक, राष्ट्रीय जनता दल, कम्युनिस्ट पक्ष बी हांचो क्रमांक लागता. आतां खरें म्हणल्यार ‘इंडी’न पुराय देशा खातीर एकूच घोशणापत्र वा वेंचणूक जाहीरनामो घेवन मतदारां मुखार येवपाची गरज आशिल्ली. पूण कल्पनादारिद्—य म्हणात वा दुरदिश्टीचो उणाव हाका लागून तशें जालें ना आनी आघाडीतल्या एकाय घटक पक्षा कडेन विचारविनिमय करिनासतना काँग्रेसींतल्या कांय फुडाऱ्यांनी ‘न्यायपत्र’ ह्या गोंडस नांवा खाला आपलो वेंचणूक जाहीरनामो जाहीर लेगीत केलो. हालींच्या तेंपार राहूल गांधीक खंयच्यानूच न्याय मेळत नाशिल्ल्यान न्याय हो तांचो सेगीत वापरती उतर जालां आनी तो खंयच जोडपाची संद चुकयना. न्यायपत्राचेंय तशेंच कितेंशें जालां आनी त्या नांवान घोशणापत्र लेगीत जाहीर जालें. काँग्रेसीचे न्यायपत्र वास्तवीक ‘इंडी’तल्या सगल्याच घटक पक्षां खातीर लागू आसूंक जाय आशिल्लें, पूण काँग्रेस फुडारपणान एकाय घटक पक्षाच्या फुडाऱ्यांक विस्वासांत घेनासतना हें सगलें जाहीर केल्ल्यान सगल्यांचोच अहंकार दुखावला, आनी फुडल्या पांच स दिसांत समाजवादी पक्षा पसून राष्ट्रीय जनता दला मेरेन चडश्या मुखेल घटक पक्षाच्या फुडाऱ्यांनी वेगळ्यावेगळ्या नांवा खाला आपापलो जाहीरनामो मतदारां मुखार दवरिल्ल्यान जो गोंदळ जाला तो कसो निस्तरचो हें आतां काँग्रेस फुडाऱ्यांकूय कळना अशेंच जालां. हातूंत मतदार मात गोंदळांत पडला हें मात सामकें खरें.
देशांत फाटलें सप्तक वेंचणूक जाहीरनाम्याचें आशिल्लें. काँग्रेस पक्षाच्या ‘न्यायपत्रा’न ह्या सप्तकाची सुरवात जाली आनी पयर आयतारा भारतीय जनता पक्षाच्या ‘मोदींची गॅरंटी’ ह्या संकल्पपत्रान ताचो समारोप जालो. ‘इंडी’ आघाडींतलो आनीक एखादो घटक पक्ष अजून आपलो जाहीरनामो घेवन मुखार येवचो ना अशी आस्त धरुया. ह्या सप्तकांत उत्तर प्रदेशांत समाजवादी पक्षाच्या अखिलेश यादव हांणी आपलें घोशणापत्र जाहीर केलें, द्रमूक, कम्युनिस्ट हेवूय फाटीं रावले नात, आनी निमाणे बिहारांत फक्त 23 सुवातो लडोवपी राष्ट्रीय जनता दलाच्या तेजस्वी यादव हांणी लेगीत पुराय देशाचो अजेंडा तय करून ‘परिवर्तन पत्र’ ह्या नांवा खाला आपलें घोशणापत्र जाहीर करचें हाका कितें म्हणप? बिहारांत तीन सुवातो लेगीत जिखपाची तांक जांकां ना तांणी देशाचो अजेंडा निश्चीत करचो हातूंतल्यान मतदार कितें निश्कर्श काडटले हें आनीक वेगळें सांगपाची गरज नासली तरी सगल्याच विरोधी फुडाऱ्यांची
मती राहूल गांधी हांचे प्रमाणूच भ्रश्ट जाल्या काय कितें असो प्रस्न कोणेय उपस्थीत करचो. एक कोटी नोकऱ्यो, सुतापुनवेच्या दिसांनी गरीब बायलांक दरेकी एक लाख रुपया, 500 रुपयांत गॅस सिलिंडर, बिहाराक खाशेल्या राज्याचो दर्जो, बिहारातं पांच नवे विमानतळ अश्यो वट्ट 24 घोशणा आपल्या परिवर्तन पत्रांत करून लालूचो पूत तेजस्वी यादव हांणी काँग्रेसीच्या न्यायपत्राचेर कडी करची हें काँग्रेस पक्षाच्या खूबशा फुडाऱ्यांक पचनाक पडलें ना, आनी तातूंतल्यान नवो वाद सुरू जावंक लागला. उत्तर प्रदेशांत अखिलेश यादव हांणीय तेंच केलें आनी एकामेकांचेर कडी करपाच्या यत्नांत वेंचणूक जाहीरनाम्या वेल्यान तथाकथीत ‘इंडी’ आघाडीचें हांशें जालां.
राहूल गांधी हांणी ‘खटाखट, खटाखट’ गरिबी हटोवपाचे हालींच केल्लें एक विधान लेगीत सद्या समाज माध्यमाचेर गाजत आसून दरेक गरिबाक एक लाख रुपया दिल्ल्यान गरिबीचें निर्मुलन जातलें ह्या तांच्या बालीश विचारांचेरूय तांची फकांडां करूंक लागल्यात. विरोधी पक्षांनी व्हड कश्टान आपआपली स्वतंत्र चूल मांडपाचो तांचो हावेस तांच्या वेगळ्यावेगळ्या जाहिरनाम्यांतल्यान स्पश्ट दिसूंक लागला आनी तीच तर प्रधानमंत्री नरेंद्र मोदी आनी तांच्या भारतीय जनता पक्षा खातीर मोटी जमेची बाजू थारूंक शकतली. वेंचणूक जाहीरनाम्यांच्या सप्तकांत निमाणें केंद्रांत फाटलीं धा वर्सां सत्तेर आशिल्ल्या भारतीय जनता पक्षाचोय जाहीरनामो जाहीर जाला. भाजपाचो जाहीरनामो हें संकल्पपत्र आसता आनी ह्या वेळार मोदींची गॅरंटी ह्या माथाळ्या खाला ते मतदारां मुखार आयल्यात. काँग्रेस आनी हेर पक्षां प्रमाणूच भाजपान मतदारां खातीर कसल्योच रेवड्यो जाहीर केल्यो नात. पूण देशाची सर्वांगी उदरगत हे खातीर मोदीची गॅरंटी हेंच ह्या संकल्पपत्राचें विशेश आसा. अयोध्येंत राममंदिराची उबारणी, घटनेंतलें 370 कलम काडून उडोवप, तीन तलाक रद्द करप अशा खूबशा आस्वासनांची पुर्तताय केल्ल्यान भाजपान परतून सत्तेर येवपा खातीर आशिल्लो विस्वास ह्या संकल्पपत्रांतल्यान दिसून येता. गरीब, तरणाटे, शेतकार आनी बायलां केंद्रस्थानार दवरुनच विकासाची हमी दितना समान नागरी कायद्याचीय हमी भाजपान दिल्या. विरोधकांच्या फटीच्या प्रचाराक ह्या जाहीरनाम्यांतल्यान जाप दिवपाचो यत्न भाजपान केला आनी तांचो फुडलो मार्ग तातूंतल्यान स्पश्ट दिसता हें म्हत्वाचें आसा.

वामन प्रभू
9823196359