भांगरभूंय | प्रतिनिधी
पणजी : कूड मेळिल्ल्या इंटर्न दोतोरा कडेन एक सिरींज मेळ्ळ्या. डिप्रेशनाक लागून ती वखदां घेताली, अशी म्हायती मेळ्ळ्या. हाचे पयलींय तिणें आत्महत्येचो येत्न केल्लो. तिचे कुडीचेर जखमो बी कांय नाशिल्ल्यो अशी म्हायती मेळ्ळ्या.
दोना पावला हवाई दर्यादेगेर कूड मेळिल्ले इंटर्न दोतोर बायलेचेर शवचिकित्सा चालू आसा. उपरांत अहवाल पुलिसांक सादर करतले, अशी म्हायती गोंय वैजकी म्हाविद्यालय हॉस्पिटलाचे वैजकी अधीक्षक डॉ. राजेश पाटील हांणी दिली.
हॉस्पिटलांत तपास केलो तेन्ना थंयच्यो सिरींजी उण्यो जावंक ना. हाका लागून तिणें सिरींज भायल्यान व्हरपाचो दुबाव आसा. मूळ केरळच्या गौरी नारायण्ण हिची इंटर्नशीप आनीक दोन दिसांत पुराय जावपाची आशिल्ली. इतल्यान बुधवारा तीची कूड दोना पावल दर्यादेगेचेर मेळ्ळी. ती दोना पावल दर्यादेगेचेर कित्याक गेल्ली आनी कशी गेली? हे विशीं आमकां कितेंच खबर ना. पुलीस तपास करतात. शवचिकित्सा आयज पुराय जातली. तिचें कुटूंब गोंयांत पावलां, अशी म्हायती डॉ. राजेश पाटील हांणी दिली.
दोना पावलाच्या हवाई दर्यादेगेर बुधवारा सांजे वेळार २३ वर्सांच्या इंटर्न बायल दोतोराची कूड दुबावीत स्थितीत मेळ्ळी. पणजी पुलिसांनी कूड ताब्यांत घेवन ती पोस्टमॉर्टेमा खातीर गोंय वैजकी म्हाविद्यालय हॉस्पिटलांत धाडली. असैमीक मरण अशी या घडणुकेची नोंद जाल्या. भलायकी मंत्री विश्वजीत राणे हांणी इंटर्न बायल दोतोराच्या मरणाच्या चवकशीचे आदेश दिल्यात.
हवाई दर्यादेगेर बायलेची कूड आशिल्ल्याची म्हायती मेळ्ळे उपरांत बुदवारा सांजे पुलिसांनी घडणूक थळार वचून पंचनामो केलो आनी कूड पोस्टमॉर्टेमा खातीर धाडली. बायलेचे कुडीचेर गोमेकॉ इंटर्नाचो युनिफॉर्म लेगीत आशिल्लो. हाका लागून तिच्या मरणा विशीं दुबावाची स्थिती आसा. तिणें आत्महत्या केली वा घातपात, हे विशीं पुलिसांचो तपास सुरू आसा. मात इंटर्नच्या मरणाक लागून परत खवदळ निर्माण जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
