इंग्लंड सेगीत दुसरे खेपे क्वॉर्टरींत

भांगरभूंय | प्रतिनिधी

तुळेन दुबळ्या आशिल्ल्या सेनेगलाक 3-0 अशा गोल फरकांनी हारोवन इंग्लंडान संवसारीक फुटबॉल सर्तीचे क्वॉर्टरफायनलींत सुवात मेळयली. सेनेगलाक मॅचींत एकदाय प्रत्त्युत्तर दिवपाक जमलें ना. इंग्लंड सेगीत दुसरे खेपे संवसारीक सर्तीचे क्वॉर्टरफायनलींत पावलो. आतां तो क्वॉर्टरफायनलींत सध्याचो वस्ताद फ्रान्सा आड 10 डिसेंबराक खेळटलो.

मॅचीचे सुरवाती सावन इंग्लंडान आक्रमक खेळ केलो. ताच्या ह्या खेळा मुखार सेनेगलाचें कांयच शाणपण चलूंक ना. मॅचीच्या 38व्या मिनटाक बेलिंगहॅमच्या पासाचेर जॉर्डन हेंडरसनान गोल केलो. हांगाच्यान सुरू जाल्लो इंग्लंडाच्या फुटबॉल मोग्यांचो जल्लोश मॅचीचे अखेर मेरेन चालूच उरिल्लो. एका गोलान फाटीं पडिल्ल्या सेनेगलान बरोबरी करपाचो यत्न केलो. पूण, ताचें व्हडलेशें शाणपण चलूंक ना. पयल्या अर्दाच्या अतिरिक्त वेळांत 46व्या मिनटाक हॅरी केनान गोल करून इंग्लंडाची आघाडी 2-0 केली.

उत्तरार्धात इंग्लंडान सुरवातीक कांय वेळ वेळ काडपाचें धोरण आपणायलें. पूण, ताका फायदो सेनेगलाक घेवपाक जमलो ना. उरफाटें ताची बचावफळी विस्कळीत जाली. तांचे हे स्थितीचो फायदो घेत कौलुबेलीच्या पासाचेर बुकायो साकान 57व्या मिनटाक इंग्लंडा वतीन आनीक एक गोल केलो.