इंग्लंडाच्यो 657 धांवड्यो; पाकिस्तानाचीय खर जाप

भांगरभूंय | प्रतिनिधी

येजमान पाकिस्ताना आड तीन टॅस्टींचे माळेंतले पयले मॅचींत इंग्लंडाचो पयलो डाव 657 धांवड्यांचेर सोंपलो. इंग्लंडान फक्त 101 ओव्हरींनी इतको व्हडलो स्कोर उबरलो. हॅरी ब्रुकान सगल्यांत चड 153 धांवड्यो केल्यो.

पयल्या दिसाच्या 4 बाद 506 धांवड्यां वयल्यान मुखार खेळटना इंग्लंडान दुसऱ्या दिसा 6 विकेटी वगडावन 151 धांवड्यो केल्यो. पाकिस्ताना वतीन पदार्पणाची टॅस्ट खेळपी लेग स्पिनर जाहिद महमूदान सगल्यांत चड 4 विकेटी घेतल्यो. नसीम शाहान 3 जाल्यार मोहम्मद अलीक दोन विकेटी फावो जाल्यो. एक विकेट हॅरीस राउफाक मेळ्ळी.

दुसऱ्या दिसाचो खेळ सोंप मेरेन पाकिस्तानान पयल्या डावांत बिनबाद 181 धांवड्यो केल्ल्यो.

दुसऱ्या दिसाच्या खेळांत इंग्लंडाची सुरवात बरी जाली ना. पयलेच ओव्हरींत नसीम शाहान बेन स्टोक्साक बोल्ड करून तंबूंत धाडलो. स्टोक्सान 18 बॉलांनी 41 धांवड्यो केल्यो. स्टोक्स बाद जाल्या उपरांत लियाम लिव्हिंगस्टोन (9) लेगीत नसीम शाहाचो शिकार थारलो.

ब्रुकान दुसऱ्या दिसा आपल्या स्कोरांत 52 धांवड्यांची भर घाली. ताका लेगीत नसीमानूच बाद केलो. ते उपरांत येवपी विल जॅक्सान 30 आनी ओली रॉबिनसनान 37 धांवड्यो केल्यो. जॅक लीच 6 धांवड्यो करून नाबाद उरलो.

इंग्लंडान आपल्या डावांत एके ओव्हरींत 6.50 धांवड्यांच्या वेगान बॅटींग केली. पाकिस्तानाच्या सतल्या चार बॉलरांची इकोनॉमी स परस चड आशिल्ली.

इंग्लंडाच्या मोठ्या स्कोराक पाकिस्तानान लेगीत जबरदस्त प्रत्तुत्तर दिलें. अब्दुला शफीक आनी इमाम उल हक हांणी पयले विकेटी खातीर अजून मेरेन 181 धांवड्यांची भागिदारी केल्या. अब्दुल्ला 89 आनी इमाम उल हक 90 धांवड्यांचेर खेळटा.