भांगरभूंय | प्रतिनिधी
एक दीस आदीं अनवळखी विशाणूक लागून दुयेंत आशिल्ल्या इंग्लंडाच्या बॅट्समनांनी पयले टॅस्टीच्या पयल्याच दिसा येजमान पाकिस्तानाच्या बॉलरांक धाडायले.
उण्या उजवाडाक लागून पयल्या दिसाचो खेळ थांबवचो पडलो, त्या वेळार इंग्लंडान 75 ओव्हरींनी 6.75चे रन रेटीन 4 बाद 506 धांवड्यो केल्यो. टॅस्ट क्रिकेटीच्या इतिहासांत पयल्या दिसा काडिल्लो आतां मेरेनचो हो सर्वोच्चो स्कोर आसा. आतां मेरेन एकाय पंगडाक 500चो आंकडो हुपपाक जमूंक नाशिल्लो. हाचे पयलीं ऑस्ट्रेलियेन 9 डिसेंबर 1910त सिडनी टॅस्टींत दक्षीण आफ्रिके आड 6 विकेटी वगडावन 494 धांवड्यो केल्ल्यो.
इंग्लंडाच्या बॅट्समनांनी वन डे भशेन बॅटींग केली. जॅक क्रावलीन 111 बॉलांनी 21 चवक्यांचे मजतीन 122 धांवड्यो केल्यो. इंग्लंडा वतीन जलद शेंकडो मारपी तो पयलो ओपनर बॅट्समन थारलो. ताच्या उपरांत बेन डकेटान 110 बॉलांनी 107, ओली पोपान 104 बॉलांनी 108 आनी हॅरी ब्रुक्सान 81 बॉलांनी 14 चवके आनी दोन सक्यांचे मजतीन नाबाद 101 धांवड्यो केल्यो. हाचे खेरीत मुखेली बेन स्टोक्सान 15 बॉलांनी स चवके आनी एका सक्याचे मजतीन 34 धांवड्यो करून खेळपट्टीचेर आसा. इतलेंच न्हय जाल्यार ब्रुक्सान एके ओव्हरींत स बॉलांनी स चवके मारपाचो पराक्रम लेगीत केलो.
उण्या उजवाडाक लागून खेळ थांबोवचो पडूंक नाशिल्लो, जाल्यार आनीक 15 ओव्हरींचो खेळ जावपाचो. घडये ह्यो ओव्हरी जाल्ल्यो जाल्यार इंग्लंड 600चो लेगीत आंकडो हुपपाक शकतालो.
मजगतीं, एकाच दिसा सगल्यांत चड धांवड्यो करपाचो विक्रम लेगीत इंग्लंडाच्या नांवार आसा. इंग्लंडान 25 जुलय 1936चे टॅस्टीच्या दुसऱ्या दिसा 6 बाद 588 धांवड्यो केल्ल्यो. टॅस्टीच्या खंयच्याय दिसा काडिल्लो सर्वोच्च स्कोर आसा.
मजगतीं, क्रावली आनी डकेट हांणी जबरदस्त सुरवात करून दिली. दोगांयनी पयले विकेटी खातीर 233 धांवड्यांची भागिदारी करून पाकिस्तानाच्या बॉलरांक घाम काडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.