भांगरभूंय | प्रतिनिधी
इंग्लंडान संवसारीक फुटबॉल सर्तीचे मोहिमेची सुरवात झणझणीत केली. डलास स्टेडियमाचेर जाल्ले एल गटांतले मॅचींत ताणें उत्कृश्ट कामगिरी करतना क्रोएशिया पंगडाक 4-2 अशा फरकांनी हारायलो.
इंग्लंडा वतीन मुखेली हॅरी केन हाणें दोन गोल केले, जाल्यार ज्युड बेलिंगहॅम आनी बदली खेळगडो म्हणून मैदानांत देंवपी मार्कस रॅशफोर्ड हांणी एकेक गोल केलो. मॅचीचे सुरवाती सावन दोनूय पंगडांनी आक्रमक खेळ केलो. सुरवातीच्या मिण्टांत क्रोएशियान इंग्लंडाच्या बचावाचेर चेंपण हाडलें. पूण, इंग्लंडान रोखडीच मॅची वयली आपली पकड घटमूट केली.
मॅचीच्या 12व्या मिण्टाक इंग्लंडाक पॅनल्टी मेळ्ळी. पॅनल्टीचेर हॅरी केनाचो पयलो यत्न क्रोएशियाचो गोलकीपर डोमिनिक लिवाकोविचान अचूक रितीन आडायलो. पूण, नेमांचें उल्लंघन जाल्ल्यान ही पॅनल्टी परत घेतली. दुसऱ्या यत्नांत केनान कसलीच चूक करिनासतना बॉल गोलपोस्टांत घालो आनी इंग्लंडाक 1-0 अशी आघाडी मेळोवन दिली.
तथापी, क्रोएशियान मॅचींत रोखडेंच पुनरागमन केलें. मार्टिन बटुरिना हाणें गोल करून स्कोर 1-1 असो केलो. ते उपरांत इंग्लंडान परतून एकदा आघाडी घेतली. कॉर्नर किकीचेर हॅरी केनान उत्कृश्ट रितीन हेडर घेवन आपलो दुसरो गोल करून इंग्लंडाक 2-1 असो मुखार व्हेलो.
पयल्या अर्दाच्या अखेरच्या खिणांत क्रोएशियान परतून एकदा स्कोर बरोबरींत हाडलो. इंज्युरी टायमांत इव्हान पेरिसीच हाका रिती सुवात मेळ्ळी आनी ताणें मुसा हाका पास दिलो, ताणें बॉल गोलपोस्टांत धुकलून स्कोर 2-2 असो केलो.दुसऱ्या अर्दांत इंग्लंडाचो पंगड वेगळ्याच रंगान मैदानांत देंवलो. खेळ सुरू जाल्या उफरांत फक्त दोन मिण्टांनी ज्युड बेलिंगहॅमान वैयक्तीक कुशळटायेच्या नेटार एक उत्कृश्ट गोल केलो. ताणें उजवे वटेच्यान बॉक्सांत प्रवेश केलो आनी अचूक शॉर्ट मारून इंग्लंडाक 3-2 अशी आघाडी मेळोवन दिली.
मॅचीच्या निमाण्या खिणांनी, बदली खेळगडो म्हणून मैदानांत देंवपी मार्कस रॅशफोर्डान गोल करीत इंग्लंडाचें जैत निश्चीत केलें. ताणें प्रतिस्पर्धी डिफॅण्डराक हुलकावणी दीत इंग्लंडाचो चवथो गोल केलो.
ते उपरांत इंग्लंडान सातत्यान आक्रमक चालूच दवरलें. बेलिंगहॅम, डेक्लान राईस आनी निको ओ’रेली हांणी गोल करपाच्यो साबाद संदी निर्माण केल्यो. पूण, क्रोएशियन गोलकीपर लिवाकोविच हाणें कांय उत्कृश्ट बचाव करीत आपल्या पंगडाक मॅचींत तिगोवन दवरलो. दुसरे वटेन, क्रोएशियानान लेगीत प्रतिहल्ले केले. पूण, मार्को पासालीच हाची नेटाची शूट इंग्लंडाचो गोलकीपर जॉर्डन पिकफोर्डान उत्कृश्ट रितीन आडायली.
ह्या जैतान इंग्लंडान तीन म्हत्वाचे गूण मेळयले. मुखेली हॅरी केनान दोन गोल करून एक विक्रम केलो. तो आतां संवसारीक सर्तीच्या इतिहासांत (शूटआवट वगळावन) सगल्यांत चड पॅनल्टी गोल करपी खेळगडो थारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
