भांगरभूंय | प्रतिनिधी
काशी, मक्का, जेरुसलेम जशें भावीक मनशाक पवित्र, तसो आॅस्कर सुवाळो सिनेकलाकाराक प्रिय. हांगा पुरस्कार मेळप म्हणजे जल्माचें सार्थक जालें, अशें भोवतेक कलाकार मानतात. सिनेमा मळा वयलो हो सर्वोच्च पुरस्कार. आमच्या देशाक मुख्य गटांत आॅस्कर मेळूंक नाशिल्ल्यान कांय भारतीय हालींच्या वर्सांनी आॅस्कर सुवाळ्याक नांवां दवरपाक लागल्यात, पूण प्रत्येक कलाकाराक भितरल्यान आॅस्कराची आस लागिल्ली आसताच. पंढरपूरच्या पांडुरंगाची भक्तांक आस लागता तशी!! ‘रारारा’ ह्या तेलुगू सिनेमांतल्या ‘नाटू नाटू’ ह्या पदाक सर्वोत्कृश्ट मूळ पदाचो आॅस्कर फावो जालो. ‘द एलिफंट व्हिस्पर्स’ ह्या लघुपटाकूय पुरस्कार मेळ्ळो. कार्तिकी गोन्साल्वीस हिणें दिग्दर्शनाच्या पयल्या यत्नांत आॅस्कर हातासलो, हें विशेश. सगल्यांक परबीं.
आॅस्कर वा अॅकडमी अवाॅर्ड्स 1929 सावन दिवप सुरू जाले. अॅकडमी आॅफ मोशन पिक्चर आर्टस अॅण्ड सायन्स ह्या वेवसायीक संस्थे वरवीं ते दितात. तांचे 9 हजार वांगडी सिनेसृश्टींत काम करतात. आयोजक ह्या सुवाळ्याचेर आनी पुरस्कार मेळोवपी कलाकारांचेर खूब खर्च करतात. मुख्य गटांत इंग्लीश सिनेमा आसतात आनी संवसारांतले सगले देश ते तयार करतात. हेर भाशांतले सिनेमाय आॅस्कर सर्तींत देंवतात. फ्रान्सान 12 फावटी विदेशी सिनेमा विभागांत पुरस्कार मेळयला. 41 फावटी तांकां नामांकन मेळ्ळां. आमचो भारतूय हे सर्तींत खूब फावटीं देंवला. 1983 तल्या ‘गांधी’ सिनेमा खातीर भानू अथय्या हिका उत्कृश्ट वेशभुशेचो आॅस्कर फावो जाला. नामनेचे दिग्दर्शक सत्यजित राय हांकां 1992 त जिणभराचे कामगिरी खातीर मानद आॅस्कर भेटयल्लें. 2009 त ‘स्लमडाॅग मिलेन्योर’ सिनेमांतल्या ‘जय हो’ पदाक उत्कृश्ट मूळ पदाचो पुरस्कार मेळिल्लो. ए आर रेहमान आनी गुलजार हांणी तो स्विकारिल्लो. (आतां ‘नाटू नाटू’ खातीर तो चंद्रबोस आनी संगीतकार किरवानी हांणी घेतला.) ‘गांधी’ सिनेमा खातीर रेहमानाक उत्कृश्ट मूळ संगीत, रसुल पुकुट्टीक आवाज मिक्सींगाचे पुरस्कार फावो जाल्ले. उत्कृश्ट विदेशी चित्रपट विभागांत दरवर्सा एक सिनेमा वता. पूण आजून मेरेन तो पुरस्कार मेळूंक ना. पयले फावट मदर इंडिया (1957) क ह्या गटांत नामांकन मेळिल्लें. सलाम बाॅम्बे (1988), लगान (2001) हांकांय नामांकन मेळिल्लें. निर्माते इस्मायल मर्चेंट हांकां चार फावटी नामांकन मेळिल्लें. तांणी लघुपट तयार केल्ले. फली बिलिमोरिया, के के कपिल हांकां म्हायतीपटा खातीर, इशू पटेल हांकां एनिमेशना खातीर नामांकन मेळिल्लें. पं. रवीशंकर हांकांय ‘गांधी’ सिनेमांतल्या मूळ पदा खातीर नामांकन मेळिल्लें. बाॅम्बे जयश्री, रितू थाॅमस, सुश्मीत घोष, शौनक सेन हांचेंय नामांकन जालां. पूण तांकां पुरस्कार मेळूंक नात. कमलासन (कमल हसन) हांकां सगल्यांत चड फावटी नामांकन मेळ्ळां.
आंतरराष्ट्रीय मळाचेर एनिमेशन सिनेमांचे शहेनशहा वाॅल्ट डिस्ने हांकां सगल्यांत चड 26 आॅस्कर पुरस्कार फावो जाल्यात. सगल्यांत चड नामांकनां मेळिल्लेय ते पयल्या क्रमांकाचे निर्माते, दिग्दर्शक. तांचे फाटोफाट जाॅन विलियम्स हांकां 52 नामांकनां मेळ्ळ्यांत. तर कॅथरिन हेपबर्न ही सगल्यांत चड चार आॅस्कर जिखिल्ली अभिनेत्री. आॅस्कर पुरस्कार आयोजकांनी आतां नवे पुरस्कार दिवपाचें थारायलां. सगल्यांत चड हीट जावपी बिगर इंग्लीश सिनेमाकूय आतां पुरस्कारा खातीर वेंचून काडटले. आमच्या कलाकारांनी हे संदीचो लाव घेवंक फावो. हाचे पयलीं विदेशी निर्मातो वा दिग्दर्शक आशिल्ल्या भारतीय कथे वयल्या सिनेमांक पुरस्कार मेळ्ळ्यात. देखीक ‘गांधी’ आनी ‘स्लमडाॅग मिलेन्योर’. ताका लागून आॅस्कर हे फक्त विदेशी, खास करून हाॅलिवूड सिनेमांकूच मेळटात, अशी टिका जाताली. चीनी सिनेमांनीय ह्या सुवाळ्यांत जायते फावटी नांव जोडलां. अंदूं उत्कृश्ट सिनेमा थारलो, त्या एवरीथींग एवरीवेयर आॅल अॅट वन्स सिनेमाकूय चिनी फांटभूंय आसा. ताका सात पुरस्कार फावो जाले. तातूंतली मिशेल योहेन ही अभिनया खातीर आॅस्कर मेळोवपी पयली आशियाई अभिनेत्री, हाचो आमकां आशियाई लोकांक अभिमान दिसूंक फावो.
आंतरराष्ट्रीय मळाचेर नांव, मान मेळोवन दिवपी हे आॅस्कर पुरस्कार मेळयतलो जाल्यार सिनेमा त्या दर्जाचे आसपाक जाय. हिंदी सिनेमा फाटल्या 10 वर्सांच्या काळांत सामकोच निसरला. अर्थांत कांय आडवाद आसात. तेन्ना आॅस्कर मेळोवपाक आमच्या कलाकारांक खूब घाम गळोवचो पडटलो, हातूंत मात्तूय दुबाव ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
