भांगरभूंय | प्रतिनिधी
सध्या भुरग्यां मदीं वाडत वचपी आॅनलायन गेमिंगा विशीं सगलेच हुस्को उक्तायतात. हें व्यसन आडावपाक खासा शिक्षण संचालनालयान पालक आनी शिक्षकांची एक समन्वयक बसका घेवन एक परिपत्रक जारी करप गरजेचें आसा.
भुरग्यांचें मोबायल आनी इंटरनेट वापराचें प्रमाण बरेंच वाडलां. कांय जाण तर दिसाक स ते सात वरां मोबायलाचेरुच आसतात. तातूंत तांकां आॅनलायन गेमींचें आकर्शण निर्माण जालां. ताका लागून मानसीक दुयेंसां वाडपाक लागल्यांत. कांय गेमींनी प्रत्येक पांवडो कठीण जायत रावता आनी भुरग्यांनी ते खेळत रावचे म्हूण तांकां अॅप्स उपलब्ध करून दितात. पूण भुरग्यांच्या शारिरीक आनी मानसीक भलायकेचेर हाचो परिणाम जाता. तांचे दोळे इबाडटात, तकलेंत दुखपाक लागता. आॅनलायन आसतना भुरग्यांच्या सभावांत बदल जाता जाल्यार, तांच्या डिव्हायसांत नवे फोन नंबर येतात जाल्यार, नव्यो ईमेल येतात जाल्यार पालक आनी शिक्षकांनी ताचेर नदर दवरची आनी तांकां सल्लोय दिवचो. मोबायल- इंटरनेटाच्या फायदो- लुकसाणाचेर पालक, शिक्षकांनी भुरग्यांक सल्लो दिवप गरजेचें.
नागरिकांक थाकाय दिवची
सध्या सरकार पूर्णपणान वेंचणूक प्रचारांत व्यस्त आसा. येवपी लोकसभा वेंचणुकेंत मतदारांक आपले करपाक सद्दां कसलो ना कसलो उत्सव भरोवप चालू आसा. हालींच लोकोत्सव जालो. शिल्प उत्सव, वायन उत्सव, मनोरंजन उत्सव अशा साबार तरांच्या उत्सवांचो शिंवर चालू आसा. लोकांक कांयच काम ना अशे तरेन ह्या उत्सवांनी तांकां व्यस्त दवरप जाता. राजधानी पणजेंतलो दरेक रस्तो खणला. जणू काय मीन काडप चालू आसा. रस्ते बंद जाल्ल्यान लोकांक स्वताच्या घरांत वाहनां व्हरपाक मेळनात. एकदां पार्क करून दवरिल्लें वाहन म्हयनोभर थंयच्यान हालोवपाक मेळना. तातूंत कला अकादमी, फुटबाॅल मैदान, कांपाल मैदान हांगां महोत्सव आयोजीत जावपाक लागल्यात.
गोंयांत बेकारी वाडल्या. पणजेंतल्या वेपाऱ्यांचो वेवसाय ठप्प जाला. सामान्य भौस वाडटीं लायट बिलां, पे पार्किंग फी (सध्या ती बंद केल्या.), घरपट्टी हाका लागून त्रासल्या. सरकारान हाचेर विचार करचो.
– गजानन बा. नायक भाटकार,
शिवकृपा, आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
