भांगरभूंय | प्रतिनिधी
पणजीः कळंगूटे दर्यादेग वाठारांत बेकायेदशीर टावट्सांक ओतो आयला. फक्त आॅक्टोबरांतूच कळंगूटे पुलिसांनी वट्ट ८४ टावट्सांचेर कारवाय केल्या. तांकां ५ ते ५० हजार मेरेनचो दंड घाला, अशी म्हायती उत्तर गोंय पुलीस अधिक्षक अक्षत कौशल हांणी दिल्या.
गोंयांत खासा करून कळंगूटे दर्यादेगेक भेट दिवपी पर्यटकांचें हीत राखपा खातीर उत्तर गोंयच्या संबंदीत पुलीस स्टेशनांनी ही खर कारवाय केल्या, अशी म्हायती अधिक्षकान दिली.
आॅक्टोबरांत गोंय पुलिसांनी उत्तर गोंयांत ९२ टावट्सांचेर कारवाय केल्या. तातूंतले सगळ्यांत चड कळंगूटे पुलीस स्टेशनांत ८४ टावट्सांचेर गुन्यांव नोंद जाला. जाल्यार पणजे ४, हणजूण आनी मोपा विमानतळ पुलीस स्टेशनांत दरेकी २ टावट्सांचेर गुन्यांव नोंद केला, अशी आंकडेवारी कौशल हांणी दिली.
पर्यटन बेकायदेशीर किजीलां मुक्त आसपी, बरी यादी, घेवन परत वच्चो म्हण टावट्सां आड ही मोहीम हातांत घेतल्या. आपले संबंदीत कार्यक्षेत्र पर्यटकांक सुरक्षीत आनी मजेचें थळ जावचें म्हण कायदो आनी सुवेवस्था राखपा खातीर पुलीस तत्पर आसात.
ह्या वर्सा कळंगूटे पुलीस स्टेशन कर्मचार्यांनी सक्रीय रितीन राज्यांत वावुरपी टावट्सांचेर खर कारवाय करीत २७१ टावट्स आनी बेकायदो एजंटांक अटक केल्या. ह्या कायद्या खाला पयले फावट अटक केल्ले टावट्सांक रु. ५ हजार आनी दोन फावट अटक जाल्ल्या टावट्सांक रु. ५० हजार दंड दिला, अशी म्हायती कौशल हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
