भांगरभूंय | प्रतिनिधी
अलिगढ: आसामांत विमान अपघातांत अलीगडचे जितेंद्र शर्मा हांकां मरण आयलें. वायुसेनेंत ते सार्जंट आशिल्ले. ५ दिसां आदीं सुटये उपरांत ते ड्युटीक जॉय्न जाल्ले. सुटयेंत घरा गेल्लो तेन्ना तांणी लग्ना खातीर एक चलीय पळोवन दवरिल्ली.
शेनवारा सकाळीं १० वरांचेर भारतीय वायुसेनेचें एएन-३२ येरादारी विमानाक उड्डाण करतना अपघात जालो. ह्या अपघातांत जितेंद्र हाचे वांगडा आनीक ४ जाण आशिल्ले. तांकाय ह्या अपघातांत मरण आयलें.
सार्जंट जितेंद्र शर्मा कोण आशिल्ले?
अलीगढ जिल्ह्यांतल्या सालपूर गांवांत रावपी जितेंद्र शर्मा (३१) हांकां ७ भावंडां. ताच्या कुटुंबांतले ते सगळ्यांत धाकटे आशिल्ले. सध्या घरांत ताची आवय राजेश्वरी देवी सोडल्यार २ व्हडले भाव रमाकांत आनी भूपेंद्र रावतात. जितेंद्राक भारतीय वायुसेनेंत १ जानेवारी २०१५ दिसा वेंचून काडलो. तांणी सुमार ११ वर्सां राष्ट्राची सेवा केली.
जितेंद्र हांचे बापूय करुआ शर्मा १२ वर्सां आदीं संवसाराक अंतरले. तांच्या बापायच्या मरणा उपरांत तांची आवय राजेश्वरी देवीन सगळ्या भुरग्यांची जतनाय घेतली. जितेंद्र हालीं सुटी घेवन आपल्या गांवांत आयिल्ले अशें कुटुंबांतल्या लोकांनी सांगलें. ५ जून दिसा ते परतून ड्युटीचेर आयिल्ले. ताच्या घरांत लग्नाची चर्चा चालू आशिल्ली. लग्ना खातीर ताणें एक चलीय पळयल्ली. बेगीनूच लग्नाची तयारी सुरू करपाची आशिल्ली, पूण ताचे आदीं ताका अपघातांत मरण आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
