आसगांव प्रकरणांत सरकार कसलीच तडजोड करचें ना : मुख्यमंत्री
भांगरभूंय | प्रतिनिधी
पणजी : आसगांवां आगरवाडेकार कुटुंबीयांचें घर मोडिल्ल्या प्रकरणांत तडजोड करून हें प्रकरण मिटोवपाचो यत्न चल्ला. अशें जरी आसलें तरी सरकार हे विशीं कसलीच तडजोड करचें ना. हातूंत घुस्पल्ल्या सगळ्यांचेर शंभर टक्के कारवाय करतले. ह्या प्रकरणांतल्या दुबावितांक धरपा खातीर गोंयचे पुलीस बेळगांव आनी मुंबय गेल्ल्याची म्हायती मुख्यमंत्री डॉ. प्रमोद सावंत हांणी दिली.
हे विशीं लोक हांगा थंय नाचतात म्हणून तांचे फाटल्यान सरकारूय नाच्चें ना. जांकां तडजोड करून प्रकरण मिटोवपाचें आसल्यार तो तांचो वैयक्तीक प्रस्न. मात आमी हे विशीं सुरू केल्ली चवकशी फाटीं घेवचे नात. घर मोडटना थंय हाजीर आशिल्ल्या गुंडांचेर कारवाय जातली. पुलीस अधिकार्यांचीय चवकशी जातली.
हो कायदो आनी सुवेवस्थेचो प्रस्न जावन आसा. आयज कागाळ करतले आनी फाल्यां ती फाटीं घेतले अशें आतां चलचें ना. लोक विवीध कारणां खातीर तडजोड करतात. अशें जरी आसलें तरी सरकार हे विशीं कसलीच तडजोड करिना. हें प्रकरण मिटयलें म्हणून कांय जाणांक आपल्याचेर कांयच कारवाय जावची ना, अशें दिसता. मात तो तांचो गैरसमज. आमी सगळ्यांचेर कायद्या प्रमाण खर कारवाय करतले, अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
