भांगरभूंय | प्रतिनिधी
म्हापशें: आसगांवा नायट क्लब सुरू जालो जाल्यार उपद्रव सुरू जातले, असो दावो करून थळाव्या लोकांनी क्लबा आड सयांची मोहीम हातांत घेवपाचो निर्णय घेतला.
आयतारा 21 एप्रीलाक आसगांव बादे कृती समितीच्या बॅनरा खाला समविचारी लोकांची श्री बारासांखळेश्वर देवळांत बसका जाली. ह्या वेळार नियोजीत नायट क्लबाक विरोध करपाचो तशेंच साबार बसका आपोवन गांवांतल्या सगळ्या मंदीर समित्यां वरवीं ह्या क्लबाक विरोध करपाचो निर्णय घेतले.
हो क्लब लोकवस्तींत येता. ताचो थेट परिणाम थळाव्या लोकांचे शांतिकायेचेर जातलो. येरादारीची कोंयडी, पबांत सोरो पियेवन थळाव्या लोकां कडेन गैरवर्तन, मारामारी, शिंदळकी सारके अनैतीक प्रकार लेगीत थंय घडयले, असो हुस्को लोकांनी उक्तायलो. गांवांत शाळा, म्हाविद्यालयां, देवळां, चर्च, नर्सींग सेंटर आसा. ह्या क्लबाक परवानगी दिली जाल्यार ताचो परिणाम विद्यार्थ्यांचेर तशेंच हेर लोकांचेर जातलोस अशें थळाव्या लोकांचें म्हणणें आसा.
सुरेंद्र गाड हांणी सांगलें, आमी निवेदनाचो मसुदो तयार करतात. हें निवेदन आसगांव पंचायत, हणजूणें पुलीस निरिक्षक, उत्तर गोंय पुलीस अधिक्षक, पुलीस म्हासंचालक, पर्यटन मंत्री, मुख्यमंत्री, थळावे आमदार, गोंय राज्य प्रदुशण नियंत्रण मंडळ आनी हेर संबंदितांक दितले. आमी हे विशीं प्रधानमंत्र्यांक पत्र बरोवपाचो विचार करतात. आमचे शालेय विद्यार्थी लेगीत प्रधानमंत्र्यांक पत्र बरयतले, अशें गाड हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
