भांगरभूंय | प्रतिनिधी
म्हापशें: आसगांवां पर्यटक दुचाकी चालक तरणाटेच्या हातांतलो 40 हजारांचो मोबायल फोन झोमून व्हरपाचो प्रकार घडलो. ह्या प्रकरणांत हणजूण पुलिसांनी दोगां दुचाकी चालक चोरां आड गुन्यांव नोंद केला.
ही घडणूक आयतारा 31 मार्च दिसा रातच्या 10.45 वरांच्या सुमाराक घडली. कागाळदार शालिनी सिंग (मुंबय) आनी तिची इश्टीण रोशनी सिंग हीं दोगांय जीए 03 एएच 3905 क्रमांकाचे यामाहा फसिनो दुचाकी वेल्यान गुगल मॅपाच्या आदारान हणजूणचे दिशेन वताल्यो.
त्या वेळार आसगांवां सिद्धी विनायक देवळा कुशीक एका दुचाकी वेल्यान आयिल्ल्या दुबावीत दुचाकी चालकांनी दुचाकीचे फाटल्यान बशिल्ली रोशनी हिच्या हातांतलो 40 हजारांचो सॅमसंग मोबायल फोन झोमून व्हेलो आनी आनी घडणूक थळा वेल्यान अती गतीन पळ काडलो.
ह्या प्रकरणांत कागाळदारींच्या कागाळीच्या आदारान पुलिसांनी सोमारा 1 एप्रील दिसा सांजवेळा भादंसंच्या 356, 379 आनी 34 कलमा खाला अनवळखी दुचाकी चालक चोरां आड चोरयेचो गुन्यांव दाखल केला. फुडलो तपास पुलीस हवालदार राजेंद्र पाटील करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
