भांगरभूंय | प्रतिनिधी
पेडणें, प्रतिनिधी ः आश्वे- मांद्र्यांचे एके बायलेन आपल्याचेर जिवघेणो हल्लो जाल्ल्याची कागाळ मांद्रें पुलिशेंत केल्ली. हे कागाळीचेर आदारुन पुलिसांनी प्रवीण सावंत, राजेश सावंत, जयराम सावंत, राजेश सावंत हांची घरकान्न, लाडू सावंत आनी ताची घरकान्न आनी हेर दुबावितां आड गुन्यांव नोंद केला.
देवी भूमिका मंदिर, आश्वें हांगा सोमारा रातीं 8 वरांचेर ही घडणूक घडली. ह्या प्रकरणा विशीं कागाळदार शीतल सावंत हांणी पुलिशेंत दाखल केल्ले कागाळी प्रमाण, श्रावणी सोमारा निमतान भूमिका देवळांत आरती आनी भजन चालू आसतना कांय जाणांनी तिका देवळांत भितर सरपाक आडायली आनी गाळी संवून मारपेट केली. विनयभंग केलो आनी मारपाची खर धमकी दिल्ल्याचेंय कागाळींत म्हणलां. ह्या प्रकरणांत भारतीय न्याय संहिता 2023 च्या कलम 352, 115 (2), 75, 351(3) आर/डब्ल्यू 3 (5) खाला मांद्र्या पुलिसांनी गुन्यांव नोंद केला.
मजगती, दुसरे वटेनच्या नागरिकांनी दिल्ले म्हायती प्रमाण, फाटल्या चार वर्सां सावन शीतल सावंत भूमिका देवळांत येवन थंयचें वातावरण इबाडपाचो यत्न करता. कोणूय आडावंक गेलो जाल्यार तांकां गाळी संवता. हाका लागून गांवांतल्या जायत्या लोकां कडेन तिचे संबंद बरें नात, अशें आशा सावंत हे बायलेन सांगलें. शीतल हांणी मारपेट केल्ल्याची कागाळ पुलिसां कडेन केल्या ती चुकीची आसा आनी खंयच्याच दादल्यान तिचेर हात उखलूंक ना अशें कथित घडणुकेची प्रत्यक्षदर्शी आशिल्ल्या बायलांनी ह्या प्रतिनिधीक सांगलें.
हेर बायलां त्या सुवातीर हाजीर नाशिल्लीं जाल्यार शीतलाचे कागाळीचेर आदारून पुलीस सगल्या दादल्यांक ताब्यात घेतले आसले, अशेंय एका बायलेन सांगलें. मांद्र्यां पुलीस स्टेशनांत शीतल सावंत हांचेर जायते गुन्यांव नोंद जाल्यात, अशेंय ह्या बायलांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
