भांगरभूंय | प्रतिनिधी
-भाजपाध्यक्ष जे. पी. नड्डांची घोशणा
पणजी: येत्या लोकसभा वेंचणुके खातीर आशीश सूद हांची गोंयचे वेंचणूक प्रभारी म्हूण नेमणूक केल्या. भाजपाध्यक्ष जे. पी. नड्डा हांणी शेनवारा सगल्याच राज्यांतल्या वेंचणूक प्रभारींची घोशणा केल्या.
आशीश सूद हे भाजपाचे दिल्लींतले ज्येश्ठ फुडारी आसात. सध्या ते जम्मू आनी काश्मीरचे सहप्रभारी म्हूण काम पळयतात. तांचे कडेन आतां गोंयचीय जापसालदारकी दिल्या. लोकसभा वेंचणूक लागीं पाविल्ल्यान भाजपान सगल्याच राज्यांतल्या तयारेंक नेट दिला. प्रभारी, सहप्रभारींच्यो नेमणुको करून तांकां संबंदींत राज्यांची भोंवडी करपाचे निर्देश दिल्यात.
हे खेपे लोकसभा वेंचणुकेंत गोंयांतल्यो दोनूय सुवातो जिखपाचो निश्चेव करून भाजपाचे केंद्र आनी राज्यांतले फुडारी मैदानांत देंवल्यात. फाटले लोकसभा वेंचणुकेंत भाजपाक उत्तर गोंयची सुवात जिखप शक्य जाले, पूण दक्षीण गोंयांतली सुवात भाजपान वगडायली. हे खेपे मात कसलीच चूक करिनासतना दोनूय सुवातो जिखपाचो यत्न चल्ला. आतां वेंचणूक प्रभारींची नेमणूक जाल्ल्यान भाजपाच्या दोनूय मतदारसंघांतल्या फुडले तयारेक गती मेळटली.
भाजपाच्या केंद्रांतल्या कांय फुडाऱ्यांनी लोंकसभा वेंचणुकेचे फाटभुंयेर गोंयांत येवन पदाधिकारी, कार्यकर्त्यांच्यो बसका घेवपाक सुरवात केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
