भांगरभूंय | प्रतिनिधी
गोंयचे फुडले पिळगे खातीर संस्थेची मागणी : सनबर्न फेस्टिवलाक विरोध
मडगांव : आवाजाच्या प्रदुशणाचो मुद्दो गोंयकारां खातीर सद्या म्हत्वाचो. रातचें उसरां व्हड आवाजांत संगीत वाजता अशें आयकूंक आयल्यारूय संबंदीत यंत्रणां कारवाय करिना. लोकांक आंदोलन करचें पडटा. ताका लागून असल्या आवाजाचें प्रदुशण करपी कार्यावळींक बंदी घालची. सनबर्न राज्यांत नाका, अशी मागणी गोंयचे फुडले पिळगे खातीरचे संयोजक जॅक मास्कारेन्हास हांणी केली.
‘गोंयचे फुडले पिळगे खातीर’ संस्थे वतीन पत्रकार परिशद घेवन दर्यादेग वाठारांतल्यान येवपी व्हड आवाजाच्या संगीताचो विशय मास्कारेन्हास हांणी मांडलो.
सनबर्नाक जायते लोक विरोध करतात. कारण तांकां ताच्या वायट परिणामां विशीं खबर आसा. सनबर्न संगीत महोत्सवाक लागून आवाजाचें प्रदुशण जाता. सनबर्न आयोजक खंयच्याच आवाजा विशींचे नेम, कायदे पाळिनात, अशें उच्च न्यायालयान सांगलें. सनबर्न आड गांवांगांवांत जागृताय करतले. जायत्या सुवातांचेर ग्रामसभेंतल्यान विरोध जाता. ताका लागून राज्य सरकारानूय आवाजाच्या प्रदुशणाक कारण थारपी खंयच्याच संगीत महोत्सवाक परवानगी दिवची न्हय. लोकांक नाका आशिल्ले महोत्सव लोकांच्या माथ्यार मारचे न्हय, अशें तांणी सांगलें.
उत्तर गोंयच्या हणजुणेंच्या लोकांक, लोकप्रतिनिधीं सयत रातचें पुलीस स्टेशनांत वयचें पडटा. कारण आवाजाच्या प्रदुशणाचे नेम पाळिनात. पुलिसां सयत प्रशासकीय यंत्रणां कांयच करपाक शकना अशें दिसून येता. हाचो त्रास थळाव्या नागरिकांक जाता. तेन्ना आपणें कितें करपाचें हें विचारिनासतना हे चळवळींत वांटेकार जावचें. व्हड आवाजांतल्यान वाजपी संगीता आड कागाळ करपाक मुखार सरचें, अशें तांणी मुखार सांगलें.
रातच्या धा वरां उपरांत आवजाची तांक कितली आसची हाकाय नेम आसात. तशे गोंय प्रदूशण नियंत्रण महामंडळान नेम तयार केल्यात. मात ताची अंमलबजावणी करिनात. पुलिसांक सांगूनय ताचेर कारवाय जायना. गुन्यांव नोंद जातात मात अशे तरेचे प्रकार बंद जायनात. ताका लागून असल्या गजाली आड आवाज काडपाची गरज आसा अशें मास्कारेन्हास हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
