भांगरभूंय | प्रतिनिधी
गाझियाबाद, खबरां संस्था: एके १० वर्सां पिरायेचे चलयेचेर तिच्या आवयच्याच इश्टान बरेच फावटीं बलात्कार केलो. ही गजाल लिपोवपा खातीर आवय ते चलयेचो छळ करताली. तशेंच तिका शिंदळकी धंद्यांत धुकलपाक सोदताली. मात ही चली सगळ्याक वाजेवन घरांतल्यान पळून गेली. ती रस्त्यार एकटीच भोंवताली तेन्ना पुलिसांनी तिका ताब्यांत घेवन चवकशी केली. उपरांत पुलिसांक तिणें घडिल्लें तें सांगलें. हे चलयेची वैजकी तपासणी केली. तिका बाल कल्याण समितीन आसरो दिला.
उत्तर प्रदेशांतल्या गाझियाबादच्या लोनी गांवांत हें सगळें घडलें. हे चलयेन सांगलें, तिचे आवयचो एक इश्ट येतालो आनी तिचेर बलात्कार करतालो. तशेंच तो आपल्या १३ वर्सां पिरायेच्या भावाचोय लैंगीक छळ करतालो. ताका लागून म्हज्या भावानूय घर सोडलें. तशेंच हें सगळे आपले आवयक खबर आशिल्लें. तिणें म्हाका शिंदळकी धंद्यांत धुकलपाचो यत्न केलो अशें तिणें सांगलें.
पुलिसांनी हे चलयेचे आवयक आनी तिच्या इश्टाक अटक केल्या. सहाय्यक पुलीस आयुक्त भास्कर शर्मा हांणी सांगलें, ही चली घरांतल्यान पळून आयिल्ली तेन्ना रस्त्यार एकटीच भोंवतना सांपडली. तिका ताब्यांत घेतले उपरांत आमकां सगळें कळ्ळें. हे चलयेन राजू नांवाचो एकलो मनीस तिचेर बलात्कार करतालो अशें सांगलां. ही चली इतली भियेल्ली, सुरवातेक तिणें सांगलें सावत्र बापायन बलात्कार केल्लो म्हणून. बापायच्या मरणा उपरांत आवय आपलें शरीर विकताली. आवयक दिसतालें हांवेंय ह्या वेवसायान येवचें. मात हांव थंयच्यान पळून गेलें,अशें ते चलयेन सांगलें, अशी म्हायती शर्मा हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
