भांगरभूंय | प्रतिनिधी
मुंबय, खबरां संस्था ः कांय भुरगीं जल्माक येतना व्यंग येतात. देखून तांकां आयुश्यभर वेगवेगळ्या समस्यांक तोंड दिवचें पडटा. हातूंत स्पायना बिफिडा जावन जल्मल्ल्या भुरग्यां मदीं फाटीचो कणो आनी मेंदूची उदरगत जायना. हाका लागून भुरग्यांच्या मेंदवांत उदक जावप, फाटींत दुखप, मुताच्या तंत्रांत इबाड जावप अशीं दुयेंसां जातात. देखून तांकां आयुश्यभर व्यंगाक तोंड दिवचें पडटा. पूण आतां अशा भुरग्यांचे दोश पोटांत आसतनाच तांचेर शस्त्रक्रिया करून काडून उडोवप शक्य जातलें. जाका लागून खंयचेंय भुरगें व्यंग जल्माक येवचें ना. बेगीनूच पयलेच खेपे ही शस्त्रक्रिया भारतांत जातली.
भारतांत दर वर्सा 40 हजार भुरगीं स्पायना बिफिडा जावन जल्माक येतात. ह्या दुयेंसाक लागून भुरग्यांच्या गळ्याचो आकार वाडटा, मुताच्या मार्गांत आडखळ येता आनी कांय ट्यूमर जातात, जाका लागून गर्भाचे उदरगतीचेर वायट परिणाम जाता. हाका लागून हीं भुरगीं जल्माक येतनाच व्यंग येतात. सादारणपणान अशा भुरग्यांचेर चार ते स शस्त्रक्रिया करच्यो पडटात. पूण, हाचे उपरांत लेगीत हें भुरगें पुरायपणान सामान्य जिवीत जगतलें हाची खात्री नासता. गुरवारपणांत फाटीचो कणो आनी मेंदवांत तयार जावपी न्यूरल ट्यूब पुरायपणान बंद जायना तेन्ना हो दुयेंस जाता. ताका लागून फाटीचो कणो आनी रगतपेशींचें लुकसाण जाता आनी भुरग्यांमदीं स्पायना बिफिडा हो मज्जासंस्थेशी संबंदीत दोश जाता. भुरग्यांच्या गुरवारपणांत आवयन केल्ल्या वेगवेगळ्या चांचण्यांनी स्पायना बीफिडा निदान जाता. हाका लागून गर्भाचेर वेळार योग्य उपचार केल्यार कायम दिव्यांग आशिल्ल्या जल्माचें प्रमाण वा जल्माक येतना भुरग्यांक मरण येवपाचें प्रमाण टाळप शक्य जातलें. लीलावती हॉस्पिटलाचे बालरोग शस्त्रक्रिया वैज डॉ. संतोष करमकार हांणी गर्भाच्या 24 सप्तकां आदीं ही शस्त्रक्रिया करची अशें सांगलें.
हे शस्त्रक्रिया वेळार गर्भाक आनी आवयक गुंगी दितात. उपरांत ही शस्त्रक्रिया गर्भाच्या गर्भाशयांतल्यान करतात. हे शस्त्रक्रिया उपरांत फुडले ८ ते १० वरां गर्भाची हालचाल जायना. त्या वेळार गर्भाच्या काळजाचेर नियंत्रण दवरतात. ते उपरांत गर्भ ल्हव ल्हव हालचाल करपाक लागता. स्पायना बिफिडा आशिल्ल्या गर्भाचेर वेळार उपचार केल्यार भलायकेन बऱ्या भुरग्याक जल्म दिवपाची शक्यताय ८० ते ८५ टक्के आसता अशें गर्भाचो शस्त्रक्रिया वैज डॉ. एग्निएस्का पास्तुस्का हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
