भांगरभूंय | प्रतिनिधी
पणजी ः ग्रामीण उदरगत खात्या वरवीं (आरडीए) दरेका मतदारसंघांतली दोन कामां पुराय करपाची हमी मंत्री गोविंद गावडे हांणी बुधवारा विधानसभा सभाघरांत उलयतना दिली. आमदार विरेश बोरकार हांणी प्रस्न-जाप वेळार हे संबंदी प्रस्न विचारिल्लो.
ग्रामीण उदरगत खात्या कडेन फावो ती मनीसबळ ना. काम करपी अधिकाऱ्यांकडेन हेर जायत्या पदांचो अतिरिक्त ताबो आसा. ताचो परिणाम मतदारसंघांतल्या कामांचेर जाता असो दावो आमदार बोरकार हांणी केलो. ताचेर खात्यांतलीं रितीं सुवाती भरपाची प्रक्रिया चालू आसा. कर्मचारी भरती आयोगा वरवीं बेगीनूच रिकाम्या पदांची जायराती जाहीर करतले अशें मंत्री गावडे हांणी सांगलें. आमदार निलेश काब्राल हांच्या प्रस्नाक जाप दितना केंद्र सरकारान आरडीए खातीरची येवजण बंद केल्या. देखून राज्य सरकाराक ताचे खाला निधी मेळना. पूण अर्थसंकल्पांत राज्य सरकारान जाहीर केल्ल्या निधींतल्यान दरेका मतदारसंघांतलीं दोन- दोन कामां पुराय करुन दितले. आमदारांनी ते संबंदी प्रक्रिया पुराय करून खात्या कडेन प्रस्ताव सादर करचो अशें आवाहन मंत्री गावडे हांणी केले.
केंद्राच्या येवजण्यांचोय लाव घेवचो: मुख्यमंत्री
गांवगिऱ्या वाठारांच्या उदरगतीची प्रक्रिया ग्रामीण उदरगत खात्या वरवीं सरकारान कडल्यान चालू आसा. गांवगिऱ्या वाठारांच्या उदरगती खातीर राज्य सरकारान फावो तो निधी दिला. हाचे भायर केंद्रीय अर्थसंकल्पांत ताचे खातीर व्हड प्रमाणांत अर्थीक तजवीज केल्या. आमदारांनी केंद्राच्या येवजण्यांचो लाव घेवचो अशें आवाहन मुख्यमंत्री डॉ. प्रमोद सावंत ह्या वेळार उलयतना केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
