आरटीआय कायदो रोखडोच कोंकणींत अणकारीत करतले : आत्माराम बर्वे

भांगरभूंय | प्रतिनिधी

पणजी ः सरकारी कार्यालयांनी चड म्हायती भौशीक रुपांत उपलब्ध करून दिवची. हाका लागून लोकांक म्हायती सोंपेपणान मेळटली आनी म्हायती अधिकाऱ्यांचें कामय उणें जातलें अशें मत मुखेल म्हायती आयुक्त अरविंद कुमार नायर हांणी उक्तायलें. शुक्रारा म्हायती आनी प्रसारण खात्यान म्हायती हक्क दिसा निमतान आयोजीत केल्ल्या कार्यावळींत ते उलयताले. ह्या वेळार म्हायती आयुक्त आत्माराम बर्वे, अॅडव्होकेट जनरल देवीदास पांगम, म्हायती संचालक दीपक बांदेकर आनी हेर मानेस्त हाजीर आशिल्ले.
म्हायती भौशीक डोमेनांत सहज मेळ्ळ्यार लोकांक म्हायती अधिकार कायद्याचो वापर करचो पडचो ना. म्हायती वेळार दिवंक नाशिल्ल्यान आनी पुराय वेळ न्हयकारल्यान अशी प्रकरणां म्हायती आयोगा कडेन येवपाक लागल्यात. पारदर्शकताये खातीर म्हायती अधिकाऱ्यान कायद्या प्रमाण वेळार आनी योग्य म्हायती दिवपाची गरज आसा. सामान्य मनशांक लागून लोकशाय तयार जाता. देखून तांकां म्हायती मेळटली हाची आमी जतनाय घेतले, अशें नायर हांणी सांगलें.
देविदास पांगम हांणी सांगलें, म्हायती अधिकाऱ्याचें काम म्हायती न्हयकारप न्हय तर ती दिवप आसा. म्हायती अधिकारांत पयल्या अपील अधिकाऱ्यांच्या अधिकारां विशीं फकत कांय उल्लेख आसात. पूण तांकां म्हायती अधिकाऱ्यां सारकेच अधिकार आसात अशें मानतात. वेगवेगळ्या प्रकरणांत न्यायालयांनी होच निर्णय दिला. देखून पयल्या अपीलीय अधिकाऱ्यांनी आपल्या अधिकारांचो वापर करप गरजेचें आसा.
तांणी सांगलें, म्हायती अधिकाऱ्यांक खंयची म्हायती दिवची हाचे विशीं योग्य गिन्यान नाशिल्ल्यान चड करून म्हायती न्हयकारतात. संवेदनशील म्हायती सोडून हेर खंयच्याय प्रकारची म्हायती दिवंक मेळटा. विधानसभेंतल्या प्रस्नांतल्यान जी म्हायती दितात ती सामान्य मनशाकय दिवंक मेळटा. म्हायती अधिकाऱ्यांनी आडवाद सोडल्यार खंयच्याय प्रकारची म्हायती दिवपाक न्हयकार दिवचो न्हय.

आरटीआय रोखडोच कोंकणींत…

आत्माराम बर्वे हांणी सांगलें, आरटीआयच्या तरतुदी प्रमाण हो कायदो राज्याचे राजभाशेंत आसपाक जाय. देखून आमी बेगीनूच कोंकणी भाशेंत म्हायती अधिकार कायदो उपलब्ध करून दितले. सध्या आयोगा कडेन प्रलंबीत आशिल्ली सुमार 350 प्रकरणांचो बेगीनांत बेगीन निवाडो लायतले. आमी ज्येश्ठ नागरिक आनी दिव्यांग आशिल्ल्यां खातीर ऑनलायन सुनावणी घेतात.