भांगरभूंय | प्रतिनिधी
पणजीः भाटी पंचायतीचे पोटवेंचणुकेंत चिटयेच्या आदाराचेर भाजपाक आरजीपी गड भेदपाक येस फावो जालें. भाटीच्या प्रभाग ३ पोटवेंचणुकेंत भाजपाचे उमेदवार आनी आरजीपीच्या उमेदवाराक समान मतां पडलीं. उपरांत चिटयेच्या आदाराचेर वेचणूक घेवन चीट भाजपाचे उमेदवाराच्या फावरांत येवन भाजप जैतिवंत थारलो.
आरजीपीची आदली पंच वांगडी एस्पेरान्सा (एस्पी) ब्रागांझा हांणी प्रभाग ३तल्यान राजीनामो दिवन आरजीपीचे तिकेटीचेर झेडपी वेचणूक लडयिल्ली. ब्रागांझा ही झेडपी म्हण वेचून आयले उपरांत प्रभाग ३ रितो आशिल्लो आनी आयतारा ह्या प्रभागाची पोटवेंचणूक जावन सोमारा निकाल जाहीर जालो.
आरजीपीची प्रतिश्ठा पणाक आशिल्ल्या प्रभाग तिनांत विचित्र राजकी घडमोडीत निकाल समान लागलो. भाजपा पुरस्कृत उमेदवार आनंद गोवेकार आनी आरजीपी उमेदवार सुजय नायक हांकां दरेकी ६० मतां पडलीं. दोगांचीय मतांची टक्केवारी ही ५० टक्के आशिल्ल्यान चिटयेच्या आदारार वेंचणूक घेतली. चिटेयेंत भाजपाक लोटरी लागून भाजपचे आनंद गोवेकार जैतिवंत थारले आनी आरजीपीक आपलो गड भाजपा कडेन शेणोवचो पडलो.
मजगतीं दोंगुर्ली-ठाणे, पिसुर्ले आनी वेर्णा पंचायतीच्या प्रभागांत पोटवेचणुको जाल्यो. दोंगुर्ली-ठाणे पंचायतीच्या प्रभाग एकात विश्वनाथ परवार आनी पिसुर्ले पंचायतीच्या प्रभाग आठांत नवू खरवत हे विरोधा विणे वेंचून आयले. जाल्यार वेर्णा पंचायतीच्या प्रभाग एकांत आंतोनियो ब्रागांजा हे ३१५ मतां घेवन जैतिवंत थारले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
