भांगरभूंय | प्रतिनिधी
बेकायदो कावलां अड्डे, जमीन पुरोवपा विशींची म्हायती घेतली समजून
म्हापशें: बार्देस म्हालांतल्या बेकायदो कावलां अड्डे आनी मातयेचो भराव घालून रस्त्या शेजराची जमीन बेकायदो पुरयिल्ले खातीर दाखल केल्ले कागाळे विशीं कसली कारवाय केली, हे संबंदी रिव्होल्युशनरी गोवन्सान उपजिल्होधिकारी यशस्विनी बी हांची भेट घेवन म्हायती समजून घेतली.
आरजी पक्षाचे संस्थापक मनोज परब, फुडारी अजय खोलकार आनी हेर कार्यकर्ते ह्या वेळार हाजीर आशिल्ले.
पत्रकारां कडेन उलयतना मनोज परबान म्हणलें, आमी वेगळ्यावेगळ्या बेकायदो विशयां वेले कारवाये विशीं केल्ले कागाळींचो नियाळ घेवपा खातीर उपजिल्होधिकाऱ्याची भेट घेतली. बेकायदो उबारिल्ल्या कावलां अड्ड्यांक तशेंच झोपडपट्ट्यां विशीं चवकशीचें काम सुरू आसा. खूबशा जाणांक बांदकाम मोडून उडोवपाचे आदेश दिल्यात अशी गवाय दिल्या.
थियेंतल्या लाला की बस्ती झोपडपट्टेक 2013 आनी 2021 वर्सा मातयेभरवण करपाचे आदेश जारी जाल्ले. पूण हाची अजून अंमलबजावणी आयज मेरेन जाल्ली ना. हो प्रकार उपजिल्होधिकाऱ्यांचे नदरेक हाडून दिलो. हाचेरूय लक्ष दिवपाचें आस्वासन उपजिल्होधिकाऱ्यांनी दिल्ल्याचें परब हांणी सांगलें.
थळावे आमदार म्हापशेंच्या बेकायदो गजालीं कडेन गंभीरतायेन लक्ष दिनात. फक्त व्होट बँक वाडोवपा कडेन तांचो भर आसा. खोर्ले वाठारांत फुकट नगरी हाचेंच उदाहरण आसा. गोंयकार आनी म्हापशेंकार हांच्या भल्या खातीर कुचेली झरीच्या संवर्धना खातीर आमदारा कडल्यान कसलीच हालचाल जायना अशी टिका तांणी केली.
मजगतीं, प्रशासकी अधिकाऱ्यांनी राज्यांतल्या बेकायदो गजालींचेर ताकतिकेन कारवाय करून शेत जमनीर जावपी बिल्डर लॉबीचें अतिक्रमण थांबोवचें. राज्य सरकारान जारी केल्ल्या परिपत्रकांत म्हणिल्ले प्रमाण खर कारवाय करून कावलां अड्डे, झोपडपट्ट्यो मोडून उडोवच्यो अशी मागणी मनोज परब हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
