भांगरभूंय | प्रतिनिधी
मडगांव, प्रतिनिधी : रिव्होल्युशनरी गोवन्सच्या फाटबळाक लागून एसटी समाजाचो राजकी आरक्षणाचो प्रस्न सुट्टलो अशें दिसता, अशें दक्षीण गोंय लोकसभा उमेदवार रुबर्ट परेरा हांणी म्हणिल्लें. ताका जाप दितना एसटी समाजांतले फुडारी रुपेश वेळीप हांणी आरजीचेर टिका केली. भाजपा सयत गोवा फॉरवर्ड, आप आनी कॉंग्रेसीन विधानसभेंत आवाज केलो. मात आरजीन केन्नाच एसटी समाजा खातीर काम करूंक ना. वेंचणुको दोळ्यां सामकार दवरून मतां खातीर आरजीचो हो स्टंट अशें तांणी म्हणलें.
आरजीन केल्ल्या वक्तव्याचेर उलयतना वेळीप हांणी, एसटी समाजाक राजकीय आरक्षण मेळचे खातीर फाटल्या दोन वर्सां सावन राज्यभरांत चळवळ उबारिल्ली. मात एकदांय रिव्होल्युशनरी गोवन्सान तांतूत वांटो घेवंक ना. ५ फेब्रुवारीक विधानसभेचेर मोर्चा व्हरपाचें एसटी समाज भावांनी थारयल्या उपरांत आरजीचे मनोज परब हांणी वक्तव्य केलें. ताचे पयलीं तांणी एकदां तरी ह्या विशयाचेर भाशण केलां काय सांगचें. मोर्चांत आस्पाव आशिल्ले आरजीचे कार्यकर्ते कितल्या बसकांक हाजीर रावले तें सांगचें. दिल्लीक दोन फावटीं वचून शिष्टमंडळाची भेट घेतली, एसटीएससी आयोगाच्या अध्यक्षांची भेट घेतली तेन्ना ते खंय आशिल्ले. राजकीय आरक्षण मेळपाचें कळ्ळे उपरांत आरजी फकत राजकीय फायद्या खातीर वक्तव्यां करता. आझाद मैदानाचेर आंदोलन करून, भाजपाक अल्टीमेटम दिवन, राजकीय आरक्षणाचो मुद्दो केंद्रीय मंत्रिमंडळाचे बसकेंत घेवपाक चेंपण हाडलें. केंद्रीय मंत्रिमंडळाचे बसकेंत अध्यादेश काडून डिलिमिटेशन समिती स्थापनेची मागणी मान्य करिनासतना विधेयक संसदेंत हाडपाचें थारयलां. आरजी आतां फकत राजकीय फायदो घेवपाचो यत्न करता. आमदार विरेश बोरकार हे मोर्चांत वांटेकार जावपूय हो एक स्टंट आशिल्लो, अशें तांणी सांगलें.
विधानसभेंत आप, गोवा फॉरवर्ड, कॉंग्रेसीन एसटी आरक्षणाचेर आवाज काडलो. भाजपाचे कांय कार्यकर्तेय आरक्षण मेळचे खातीर एसटी भावां सयत आसात. मात आरजीन विधानसभेंतूय हाचेर उलोप करूंक ना. एसटी समाजान वेंचणुकांचेर बहिष्कार घातल्यार आरजी वेंचणुकांचेर बहिश्कार घालतले? अशें आसल्यार तांणी स्पश्ट करचें अशेंय तांणी सांगलें.
आरजीक लागून एसटी आरक्षण आंदोलनाक येस : आरजी
लोकसभा वेंचणुके पयलीं राजकीय आरक्षण दिवपाचें आस्वासन राज्य सरकारान पाळूंक ना. चुकीची म्हायती दिवन लोकांमदीं गैरसमज पातळटा. एसटी समाजाक आजूनय राजकीय आरक्षण मेळूंक ना. एसटी समाजाच्या मिशन राजकीय आरक्षण चळवळीक आरजीन फाटबळ दिल्ले खातीरूच आरक्षण दिवपाची प्रक्रिया सुरू जाली आनी राज्य सरकाराक शिश्टमंडळ घेवन दिल्लीक वयचें पडलें. आरजी सोडून दुसर्या खंयच्याच पक्षाक एसटी समाजाक राजकीय आरक्षण मेळिल्लें नाका. ते भाजपान भुलयल्ले गजाली विशीं उलयनात. सरकार फकत एसटी भावांच्या भावनां कडेन खेळटा. आरजी फुडारी आनी कार्यकर्ते मोर्च्याक वांटेकार जाल्ल्यान आरक्षणाच्या आंदोलनाक येस आयलें आनी तांच्या शिष्टमंडळाक दिल्लीक व्हेलें, अशें रिव्होल्युशनरी गोवन्सचे दक्षीण गोंयचे लोकसभा उमेदवार रुबर्ट परेरा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
