भांगरभूंय | प्रतिनिधी
बाबर आझम बॅटींगेंत पयले सुवातेर, शुभमन गील एके सुवातेन फाटीं
मुंबयः आयसीसीन जाहीर केल्ले ताजे क्रमवारींत इंग्लंडचो स्पिनर बॉलर आदील राशीद हो ट्वेटी-20 बॉलरांंत पयले सुवातेर पावला. पाकिस्तानचो आदलो मुखेली बाबर आझम हांणी वन डे बॅट्समनांचेर क्रमवारींत शुभमन गिलाक फाटीं उडोवन परतून पयलीं सुवात मेळयल्या.
इंग्लंडाचो पंगड वेस्ट इंडिज भोंवडेर आसा, थंय राशिदान तोखणायेची कामगिरी केल्या. ताणें अफगाणिस्तानच्या राशीद खान आनी भारताच्या रवी बिश्नोई हांकां अनुक्रमे दुसरे आनी तिसरे सुवातेर धुकल्ला. बिश्नोईक दक्षीण आफ्रिके आडचे वन डे माळेंत संद मेळूंक नाशिल्ल्यान ताची नंबर वन सुवात गेल्या.
ट्वेटी-20 क्रमवारींत बालिंगेंत नंबर वन सुवात मेळोवपी राशीद हो इंग्लंडाचो ग्रॅमी स्वॅन हांचे उपरांत पयलोच खेळगडो आसा. हाचो अर्थ फाटल्या सप्तकांत ट्वेटी-20 बॉलिंगेचे क्रमवारींत नंबर वन सुवातेर तीन वेगवेगळे खेळगडे आशिल्ले. वेस्ट इंडिजाचो स्पिनर अकील होसेन तिसरे सुवाते वयल्यान 6वे सुवातेर आनी दक्षीण आफ्रिकेचो तब्रेझ शम्झी तिसरे सुवाते वयल्यान णवे सुवातेर देंवला. वेस्ट इंडिजाचो बॅट्समन ब्रेंडन किंग 6 वे सुवातेर, निकोलस पूरन 12 वे सुवातेर, रोव्हमन पॉवेल 23 वे सुवातेर आनी कायले मेयर्स 33 वे सुवातेर हांचे क्रमवारींत सुदारणा जाल्या.
भारताचो सूर्यकुमार यादव पयले सुवातेर कायम आसा, जाल्यार इंग्लंडाचो फिल सॉल्टान 20 वे सुवातेर पावला.
वन-डे क्रमवारींत पाकिस्तानच्या बाबरान 824 रेटींग पॉयंट सयत पयले सुवातेर पावला. शुभमन गिलाक अाफ्रिके आडचे वन-डे माळेंत विसव दिल्लो. ताका लागून तो 810 रेटींग पॉयंट सयत दुसरे सुवातेर पावला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
