भांगरभूंय | प्रतिनिधी
खबरां संस्था
अहमदाबादः सनरायजर्स हैदराबादाक 7 विकेटींनी हारोवन गुजरात टायटन्सान आयपीएलांतले 12 वे मॅचींत आपल्या दुसऱ्या जैताची नोंद केली. अहमदाबादच्या नरेंद्र मोदी स्टेडियमाचेर तांणी सनरायजर्साक तांच्या डावांत 162 धांवड्यांत आवट करून 19.1 ओव्हरींत 3 आवट 168 धांवड्यो करून 7 विकेटींनी जैत मेळयलें. डेव्हीड मिलर (44) आनी साई सुदर्शन (45) हांणी तांच्या जैताचें मुळावण घातलें. ताचे पयलीं वर्धमान साहा (25) आनी कॅप्टन शुममन गील (36) ह्या ओपनरांनी डावाची बरी सुरवात केली.
सनरायजर्साचें 163 चें लक्ष्य
सनरायजर्स हैदराबादान गुजरात टायटन्साक जैता खातीर 163 धांवड्यांचें लक्ष्य दिलें. टॉस जिखून पयलीं खेळटना तांणी 20 ओव्हरींत 8 आवट 162 धांवड्यो केल्यो. मयांक अगरवाल आनी हेड हांणी तांच्या डावाक सुरवात केली. 58 धांवड्यांत ह्या दोनूय ओपनरांक अझमतुल्ला आनी नूर अहमदान आवट केलें. मयांकान 17 बॉलांत 16 आनी हेडान 14 बॉलांत 3 चौक्यांनी 17 धांवड्यो केल्यो. पंगडाच्या 74 धांवड्यांचेर अभिषेक शर्मा 2 चौके आनी 2 सक्यांनी 20 बॉलांत 29 धांवड्यो करून मोहित शर्माच्या बॉलार शुभमन गिलाच्या हातांत कॅच दिवंन आवट जालो. पंगडाचो शेकडो जातगीर क्लासेनान 24 धांवड्यांचेर रशिद खानान बोल्ड केलो. ताणे दोन सके आनी एका चौक्यान 13 बॉलांत 24 धांवड्यो केल्यो. 114 धांवड्याचेर मार्करामाक ( 17) उमेश यादवान रशिद खाना वरवीं कॅच आवट केलो. शहाबाज अहमद (22) आनी अब्दुल समद (29) हाणी डाव मात्सो सांबाळलो. शाबाज अहमदाच्या रुपान सनरायजर्साचीं 7 वी विकेट पडली. सामद रनआवट जालो. वॉशिग्टन सुंदराक शून्याचेर आवट करून मोहित शर्मान तांचो डाव 162 धांवड्यांत सोपयलो. ताणे 25 धांवड्यांत 3 विकेटी घेतल्यो. अझमतुल्ला, उमेश यादव, रशिद खान आनी मूर अहमदाक दरेकी एक विकेट मेळ्ळी.
वर्धमान साहान आनी कॅप्टन शुभमन गिलान गुजरात टायटन्साच्या डावाची सुरवात केली. शहाबाज अहमदान वर्धमानाक कुमिन्सा वरवी कॅच आवट करून गुजराताक पयलो धपको दिलो. ताणे 13 बॉलांत दोन सके आनी एका चौक्यान 25 धांवड्यो केल्यो. पंगडाच्या 74 धांवड्याचेर मार्कडेयान कॅच आवट केलो. ताणे फकत 36 धांवड्यो करून क्रिकेट मोगींची निर्शेणी केली. साई सुदर्शन आनी डेव्हीड मिलरान पंगडाक जैतिवंत करपा खातीर खेळ केलो. ताणी तिसरे विकेटी खातीर 74 धांवड्यांची भागिदारी करून पंगडाक जैताच्या लागीं हाडलें. बोर्डार पंगडाच्यो 138 धांवड्यो लागल्यो तेन्ना साई सुदर्शनाक कमिन्सान कॅच आवट केलें. आपल्या संयमी खेळांत ताणे 4 चौके आनी एका सक्यान 36 बॉलांत 45 धांवड्यो केल्यो. अर्द शेंकडो करपाक ताका पांच धांवड्यो उण्यो पडल्यो. विजय शंकराक वांगडा घेवन डेव्हीड मिलरान पंगडाच्या जैताचो सोपस्कार पुराय केले. 20 वे ओव्हरीत 3 आवट 168 धांवड्यो करून तांणी 7 विकेटींनी जैत मेळयलें. मिलरान नाबाद 44 आनी विजयान नाबाद 14 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
