भांगरभूंय | प्रतिनिधी
पणजी : मुख्यमंत्री सुकन्या कौशल्य विकास प्रोत्साहन येवजणे खाला आयटीआयंत प्रवेश घेवपी सगल्या चलयांची ट्युशन फी अंदूं सावन माफ जातली. हाचे पयलीं एससी, एसटी आनी तीन लाख वर्सुकी येणावळ आशिल्ल्या विद्यार्थ्यांची ट्युशन फी माफ जाताली. आतां मात कितली वर्सुकी येणावळ आसली तरी सर्वसामान्य गटांतल्या चलयांची ट्युशन फी माफ जातली. सगल्या चलयांक येवजणेचो लाव मेळटलो, अशी म्हायती कारागिरी संचालनालयाचे संचालक विनायक कांबळी हांणी दिली.
सरकारान आयटीआयंत प्रवेश घेवपी चलयांची ट्युशन फी माफ करपी मुख्यमंत्री सुकन्या विकास प्रोत्साहन येवजणेक मान्यताय दिल्या. हे येवजणे विशीं उलयतना संचालक विनायक कांबळी हांणी ही म्हायती दिली. आयटीआय अभ्यासक्रमांत प्रवेश घेवपी विद्यार्थ्यांक 300 रुपया प्रक्रिया शुल्क, शिकवणी शुल्क (ट्युशन फी) 2500 रुपया आनी हमी रक्कम (डिपॉझीट) 1500 रुपया भरचे पडटात. अभ्यासक्रम पुराय जाले उपरांत सगल्या विद्यार्थ्यांक हमी रक्कम (डिपॉझीट) 1500 रुपया परत मेळटात. हे फुडें लेगीत ते मेळटलेच, मात हे येवजणेक लागून चलयांक 2500 रुपयांचें शिकवणी शुल्क (ट्युशन फी) भरचे पडचे ना. हे येवजणेचो सरसकट सगल्या चलया विद्यार्थ्यांक लाव जातलो. हाचे पयलीं एससी, एसटी तशेच वर्सुकी 3 लाखा मेरेन येणावळ आशिल्ल्यांकूच ट्युशन फी माफ आशिल्ली. मुख्यमंत्री सुकन्या कौशल्य विकास प्रोत्साहन येवजण ही वेगळ्या स्वरुपाची आसा, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
