भांगरभूंय | प्रतिनिधी
प्रतिमा कुतिन्होः सगळ्यांनी सरकाराक एकवट दाखोवपाचो उलो
भांगरभूंय । प्रतिनिधी
सांगें: आमची आवय म्हादय सरकार विकपाक फुडें सरला. तिका वांटोवपा खातीर सगळ्यांनी एकठांय येवपाची गरज आसा. सरकार म्हादयचेर राजकारण करता. आमची म्हादय व्हरपा खातीर मुख्यमंत्री डॉ. प्रमोद सावंत तेंको दिता. असलो पयलो मुख्यमंत्री आमकां गोंयाक मेळ्ळा. कर्नाटकांत भाजपाक जिखून हाडचे खातीरतो बुरशें राजकारण करता. ते खातीर आमची आवय वाटावपा खातीर आयतारा 19 मार्चाक सांजेच्या 4 वरांचेर सांगें बसस्टॅण्डाचेर जाहीर सभा आपयल्या. तिका सगळ्यांनी हाजीर रावचें, असो सेव्ह गोवा सेव्ह म्हादय चळवळीची फुडारी प्रतिमा कुतिन्हो हांणी उलो मारला.
18 मार्चाक सांग्यार घेतिल्ले पत्रकार परिशदेंत कुतिन्हो उलयताली. ह्या वेळार नगरसेवक मॅश्यू डिकॉस्टा, रुमाल्डो फर्नांडीस, मिल्टन फर्नांडीस, विकास भगत आनी सावियो डिकॉस्टा हाजीर आशिल्ले.
आयज सरकार प्रशासन तुमच्या दारांत हो उपक्रम चलयता. ताचे बदला म्हादय वाटावपा खातीर गांवांनी भोंवप गरजेचें आशिल्लें. पूण सरकार तशें करिना. प्रशासन तुमच्या दारांत अशे उपक्रम हातांत घेवन लोकांक तो पिश्यांक काडटा, अशें कुतिन्हो हांणी सांगलें.
जशी म्हादय उत्तर गोंयाक लागता तशें म्हादय कडेन आमचेंय नातें आसा. म्हादय साल्वार करपा खातीर खरी गजाल लोकांक सांगपा खातीर 19 मार्चाक जाहीर सभेचें आयोजन केलां. सगळ्यांनी हे सभेक येवन सरकाराक आमचो एकवट दाखोवपाची गरज आसा. ही सभा कोणाच्याच विरोधांत आसची ना, तशेंच ताका राजकी रंग आसचो ना, अशें कुतिन्हो हांणी स्पश्ट केलें. ह्या वेळार मॅश्यू डिकॉस्टा, रुमाल्डो फर्नांडीस, विकास भगत, मिल्टन फर्नांडीस हांणीय आपले विचार मांडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
