भांगरभूंय | प्रतिनिधी
येजमान भारत आनी दक्षीण आफ्रिका ह्या पंगडां मदीं आयज माळेंतली दुसरी टी-20 मॅच हांगाच्या बाराबती स्टेडियमाचेर जातली.
भारताक माळेंत बरोबरी सादपाक जाय जाल्यार भारताच्या बॉलरांक आपल्या प्रदर्शनांत सुदारणां करची पडटली. तशेंच ऋषभ पंताक आपूण फुडारपण योग्य रितीन करपाक शकता हें लेगीत सिद्ध करचें पडटलें.
स्पिनर युजवेंद्र चहलाचो योग्य रितीन उपेग करून घेवचो पडटलो. पयले मॅचींत हारीचें मुखेल कारण म्हणल्यार बॉलींग विभाग. आयचे मॅची खातीर अर्शदीप आनी फास्ट बॉलर उमरान मलिक हांच्या मदल्या एकल्याची निमाण्या इकरांत निवड जावपाक शकता. बॅटींग विभागांत कसलोच बदल जावपाची शक्यताय ना.
पयले मॅचींत भारताच्या बॅट्समनांनी जबरदस्त प्रदर्शन केल्लें. पूण, फास्ट बॉलरांनी निर्शेणी हाडली. अणभवी भुवनेश्वर कुमार पयलीच्या फॉर्मांत दिसूंक ना. निमाण्या ओव्हरींनी भुवनेश्वरा वांगडा हर्षल पटेल हाणें लेगीत खूब धांवड्यो दिल्यो. आवेश खानान लेगीत निर्शेणी हाडली. पूण, आयचे मॅची खातीर हे तिकडीचेर खाशेली जापसालदारकी आसतली.
दुसरे वटेन दक्षीण आफ्रिका जैताचो क्रम चालूच दवरपाक इत्सूक आसतलो. पयले मॅची खातीर एडेन मार्करम पंगडांत नाशिल्लो. कोरोनाचो संसर्ग जाल्लो. पूण, आयचे मॅचींत तो खेळपाक शकता.
पयले मॅचींत मार्करमाचे सुवातेर ट्रिशन स्टब्साक पदार्पण करपाची संद मेळिल्ली. पूण, डावाची सुरवात करपाक मुखेली टेम्बा बावुमा मैदानांत देंविल्लो. ओपनर म्हणून तो अपेशी थारलो आसलो तरी रासी आनी मिलर हाणें मॅच घुंवडायल्ली. तांकां आडावप भारताच्या बॉलरां खातीर आव्हान आसा.
आफ्रिकेचे बॉलर पयले मॅचींत भारताच्या बॉलरां भशेन म्हारग थारिल्ले. पूण, आयचे मॅची खातीर ते पुर्ण तयारी करून मैदानांत देंवपाक इत्सूक आसतले.
खेळपट्टी विशीं सांगचें जाल्यार बाराबती स्टेडियमाची खेळपट्टी मात्शी स्लो आसता. हाचेर बॉलरांक बरी मजत मेळटा. तशेंच स्पिनरांक लेगीत चड मजत करपाक शकता. खेळ जसो मुखार वता तशी हाचेर बॅटींग करप कठीण जाता. ताका लागून टॉस जिखपी पंगड पयलीं बॅटींग करपाचो निर्णय घेवपाक शकता.
दोनूय पंगडां मदीं आतां मेरेन 16 टी-20 मॅची जाल्यात. हातूंतल्यो 9 मॅची भारतान जाल्यार 7 मॅची आफ्रिकेन जिखल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
