भांगरभूंय | प्रतिनिधी
येजमान भारत आनी न्युझिलॅण्ड ह्या पंगडां मदीं आयज माळेंतली दुसरी टी-20 मॅच जातली. पयले मॅचींत सुरवातीच्या बॅट्समनांचें अपेस आनी मुख्य बॉलरांचें बाबत प्रदर्शन हाका लागून भारताक हार घेवची पडिल्ली. माळेंतलें आव्हान कायम राखपाक भारताक आयची मॅच खंयचेय परिस्थितींत जिखचीच पडटली. ताका लागून इशान किशन, दीपक हुड्डा आनी राहुल त्रिपाठी हांकां बरें प्रदर्शन करचें पडटलें.
हार्दिक पांड्याच्या फुडारपणाखाला खेळपी भारताचो पंगड न्युझिलॅण्डाच्या जाळांत घुस्पिल्लो. ते मॅचींत भारताच्या फास्ट बॉलरांचें दुबळो दुवो लेगीत मुखार आयिल्लो. अर्शदीप सिंग आनी उमरान मलिक हांणी प्रतिस्पर्धी पंगडांक चड धांवड्यो दिल्ल्यान येजमान चेपणाखाला आयलो. मलिकान एके ओव्हरींत 16 धांवड्यो दिल्ल्यो, जाल्यार अर्शदीपान निमाणे ओव्हरींत 27 धांवड्यो दिल्ल्यो. ताका लागून धांवड्यांचो फाटलाव करपी भारताचेर चेपण आयलें.
अर्शदीप सिंगाची निमाणी ओव्हर अखेरेक मॅचीचो टर्नींग पॉयण्ट लेगीत थारलो. भारताची सुरवात लेगीत बरी जाली ना. ताचे मुखेल तीन बॅट्समन फकत 15 धांवड्यां भितर तंबूंत परतून गेल्ले. भारतान हारीचें अंतर खूब उणें केलें ताचें स्रय फकत वॉशिंग्टन सुंदराक वता. ताणें अर्द शेंकड्याची खेळी केली.
फास्ट बॉलर अपेशी थारले आसले तरी आयचे मॅची खातीर फास्ट बॉलर मुकेश कुमाराक पदार्पणाची संद मेळटली अशें दिसना. अर्शदीपाक आनीक एक संद मेळुये. शुभमन गिलान वन डे क्रिकेटींत जबरदस्त प्रदर्शन केल्लें. पूण, पयले टी-20 मॅचींत ताचो तो फॉर्म दिसलो ना. तो अजून मेरेन फकत चारूच टी-20 मॅची खेळ्ळा आनी फुडारांत ताका आनीक संद मेळटली हातूंत दुबाव ना. पूण, सध्या इशान किशन आनी दीपक हुड्डा हांचो फॉर्म पंगडा खातीर हुस्क्याचो विशय थारला.
इशान किशनान पोरूं बांगलादेशा आड वन डे क्रिकेटींत दोट्टी शेंकडो मारिल्लो. पूण, ताका फॉर्म कायम राखपाक जमूंक ना. ओपनर म्हणून मैदानांत देंवपी इशानान ते उपरांत 37, 2,1,5, नाबाद 8, 17 आनी 4 धांवड्यो केल्यात. आंतरराष्ट्रीय टी-20चो विचार केलो जाल्यार ताणें निमाणो अर्द शेंकडो 14 जून 2022त दक्षीण आफ्रिके आड मारिल्लो. हुड्डा लेगीत पावर हिटराच्या रुपान चड येस मेळूंक ना. फाटल्या 13 डावांनी फकत 17.88चे सरासरीन धांवड्यो केल्यात. हे मजगतीं ताचो सर्वोच्च स्कोर श्रीलंके आड मुंबय खेळिल्ले मॅचींत नाबाद 41 आशिल्लो. शुक्रारा रांचींत जाल्ले मॅचींत ताणें 10 बॉलांनी 10 धांवड्यो केल्ल्यो. पूण, ताका आयचे मॅची खातीर संद मेळटली अशी शक्यताय आसा.
पयले मॅचींत हारून लेगीत भारता खातीर वॉशिंग्टन सुंदराचें प्रदर्शन सकारात्मक गजाल आसा. ताणें बरी बॉलींग करपा खेरीत उपरांत सवे सुवातेर येतना 28 बॉलांनी 50 धांवड्यांची खेळी केल्ली.
सुर्यकुमार यादव उत्कृश्ट फॉर्मांत आसा. पूण, ताका सुरवातीच्या बॅट्समनां कडल्यान बऱ्या योगदानाची गरज आसा.
दुसरे वटेन न्युझिलॅण्डा आयची मॅच जिखून माळ बोल्सांत घालपाक इत्सूक आसतलो. ताची भिस्त परतून एकदा डॅव्हॉन कॉन्वे आनी डॅरल मिशेल हांचेर आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
