भांगरभूंय | प्रतिनिधी
इंडीयन प्रिमीयर लिगेची (आयपीएल) 18वी मॅच चेन्नय सुपरकिंग्स आनी सनरायझर्स हैदराबाद ह्या पंगडां मदीं हांगाच्या राजीव गांधी आंतरराष्ट्रीय स्टेडियमाचेर जातली. फाटले मॅचींत येजमान सनरायझर्स हैदराबादान पयलीं बॅटींग करतना 277 धांवड्यांचो दोंगर उबारिल्लो. पूण, चेन्नय सुपरकिंग्सा आड ताचें प्रदर्शन तितलें बरें ना. दोनूय पंगडां मदीं अजून मेरेन 19 मॅची जाल्यात हातूंतल्यो फकत पांच मॅची सनरायझर्सान जिखल्यात, जाल्यार 14 मॅचींनी चेन्नय पंगडान येस मेळयलां.
भुवनेश्वर कुमार नवो बॉल बरे तरेन हाताळटा. पण, हैदराबादांत खेळटना पावर प्लेंत तो अपेशी थारला. 2016 आनी 2017त भुवनेश्वरान हैदराबादांत खेळटना पावर प्लेंत 14 मॅचींतल्यान 8 विकेटी घेतिल्ल्यो. ह्या कालावधीत ताची इकॉनोमी स परस उणी आनी सरासरी 20 परस उणी आशिल्ली. पूण, 2018 सावन आतां मेरेन ताणें 22 मॅचींनी खेळटना फकत चार पावरप्लेंत ताका विकेट मेळ्ळ्यात.
2022 सावन अजून मेरेन स्पिनर्सांक येसस्वी रितीन तोंड दिवपी पांच बॅट्समनांतले तीन बॅट्समन आयज ह्या मैदानांत खेळटना दिसतले. हॅन्रीक क्लासेन हे वळेरेंत वयले सुवातेर आसा. ताणें 2022 सावन आयपीएलांत स्पिनर्सां आड 200 चे स्ट्रायक रेटीन 344 धांवड्यो केल्यात. ह्या कालावधीत ताची सरासरी 114.6 इतकी आशिल्ली.
अभिषेक शर्मान ह्या कालावधीत 166.6चे स्ट्रायक रेटीन 335 धांवड्यो केल्यात. चेन्नयचो शिवम दुबेन 161.1चे स्ट्रायक रेटीन 55.5 चे सरासरीन 332 धांवड्यो केल्यात. ज्या पंगडाचे स्पिनर्स ह्या बॅट्समनांक आडावपाक येसस्वी थारतले त्याच पंगडाची जैताची संद चड आसतली.
दिल्ली कॅपिटल्सा आड 16 बॉलांनी 37 धांवड्यांची खेळी करून आपले मदीं अजून खूब बॅटींग बाकी आसा हें महेंद्रसिंग धोनी दाखोवन दिल्लें. चडशे खेपे धोनी हो रवींद्र जडेजा उपरांत मैदानांत येता. पूण, जडेजाचो फॉर्म पळयलो जाल्यार धोनीक वयले सुवातेर बॅटिंगेक धाडपाची शक्यताय आसा. जडेजान 2022 सावन अजून मेरेन 25 डावांनी सुमार 24चे सरासरीन 359 धांवड्यो केल्यात. 2020 आनी 2021त जडेजान 57.3 चे सरासरीन धांवड्यो केल्ल्यो.
सनरायझर्सा कडेन लेग स्पिनर, ऑफ स्पिनर आनी दाव्या हातान स्पिन बॉलींग घालपी बॉलर आसा. पूण, ह्या सगल्यां आड दुबेचें प्रदर्सन जबरदस्त आसा. 2022 सावन दुबेन दाव्या हातान बॉलींग घालपी स्पिनर्सां आड 61 चे सरासरीन धांवड्यो केल्यात आनी फकत एकदाच बाद जाला. लेग स्पिनर्सां आड दुबेची सरासरी 53 इतकी आसा. पूण, तांच्या तो सगल्यांत चड तीन खेपे बाद जाला. ऑफ स्पिनर्सां आड दुबेची स्ट्रायक रेट उणी जावन 142.1चेर पावता. पूण, सरासरी 108 इतकी आसा. तांच्या आड तो फकत एकदाच बाद जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
