आयज आनी फाल्यां गोंयांत उटंगाराच्या पावसाची शक्यताय
भांगरभूंय | प्रतिनिधी
पणजी ः फुडल्या दोन दिसांत गोंया सयत कर्नाटक, महाराष्ट्र तशेंच देशांतल्या हेर राज्यांनी व्हड पावस पडपाची शक्यताय आयएमडीन उक्तायल्या. काय दीस विसव घेतले उपरांत काल सावन पावसान परतून नेट धरला.
काल सावन गोंयांत परतून पावसाचो सांवार चडला. जायत्या वाठारांतले रस्ते, पुला उदकापोंदा गेलें. उटंगाराच्या पावसाक लागून अंत्रुजनगर-कुर्टी (फोंडें) राखणे वणत कोसळ्ळी. जाल्यार वेर्णेंच्यान लोटले वचपी म्हामार्गाचेर पालसणां कोसळिल्ल्यान येरादारीक आडखळ जाली. तशेंच मेरशे अंडरपास लागसारच्या रस्त्याचेर उदक भरिल्ल्यान वाहन चालकांक उदकांतल्यान गाडयो व्हरच्यो पडल्यो. तशेंच पणजे बस स्टॅण्डा कडेन पावसाचें उदक भरिल्लें. ताका लागून येरादारीक आडखळ जाली. कुजीरा – गोमेकॉ लागसार उदक भरिल्ल्यान विद्यार्थ्यांक त्रास जालें. जाल्यार पेडणें नुस्ते मार्केटांत हुंवार आयलो. पुराय नुस्तें मार्केटांत उदक भरिल्ल्यान ताचो त्रास लोकांक जालो. देखून नवें नुस्तें मार्केट दिवपाची नुस्तेकार आनी पेडणेंची थळावी जोत्स्ना कामुलकार हिणे सरकार आनी पालिकेक विनवणी केल्या.
हेंय वाचात –
साश्टीक पावसाचो फटको: रस्ते उदका पोंदा, पालसणां कोसळिल्ल्यान येरादारीक आडखळ
फाटल्या 24 वरांत सरासरी 1.10 इंच पावसाची नोंद जाल्या. 1 जून ते 24 सप्टेंबर मेरेन 167.72 इंच पावसाची नोंद जाल्या. मजगतीं, आयज पावसाचो ‘रेड अलर्ट’ जारी केलां. आयज आनी फाल्यां गोंयांत उटंगाराच्या पावसाची शक्यताय हवामान खात्यान उक्तायल्या. जाल्यार फाल्यां ‘ऑरेंज अलर्ट’ आनी 26 वेर ‘यलो अलर्ट’ जारी केला.
पावसाचो सांवारः पणजे बस स्टॅण्डा कडेन भरिल्लें पावसाचें उदक. (व्हिडियो – नारायण पिसुर्लेकार)
अंदूं पावसाचे प्रमाण 43.7 टक्के चड आसा. मजगतीं, वाळपय सगळ्यांत चड 215.34 इंच पावस पडला. हाचे उपरांत सांग्यार 207.56 इंच, सांखळे 182.48 इंच, केपें 182.34 इंच, पेडणें 170.01 इंच, फोंडें 165.40 इंच आनी पोरणें गोंय 162.58 इंच पावस पडला. अंदूंच्या पावसाक लागून हंगामी आनी वर्सुकी पावसाचो नवो विक्रम तयार जाला.
गोंयांत फुडल्या 24 वरांनी व्हड पावस वाडपाची शक्यताय आसा. आपत्कालीन परिस्थितींत नागरिकांनी 0832-2419550, 2225383, 2794100 ह्या क्रमांकाचेर संपर्क करून मजत मागची अशें राज्य आपत्ती वेवस्थापन प्राधिकरणान कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
