भांगरभूंय | प्रतिनिधी
दिवचल: अस्नोडें ते मुळगांव बायपास रस्त्याच्या कामाक चालना मेळटली. आयज (बुधवारा) सकाळीं धा वरांचेर मुख्यमंत्री डॉ. प्रमोद सावंत हांचे हस्तुकीं रस्त्याच्या कामाच्या बुन्यादीचो सुवाळो कम्युनिटी सभाघर अस्नोडें हांगा आयोजीत केला.
ह्या वेळार मंत्री नीळकंठ हळर्णकार, राज्यसभा खासदार सदानंद शेट तानावडे, आमदार डॉ. चंद्रकांत शेट्ये, मुख्य सचीव पुनीत गोयल आनी प्रधान मुखेल अभियंतो उत्तम पार्सेकार बी मानेस्त हाजीर रावतले.
चार लेन बायपास रस्तो सुमार तीन किलोमिटर आसून 110 कोटी रुपया खर्च करून हो रस्तो जातलो. ते खातीर अस्नोड्यां जावपी येरादारीची कोंयडी आनी लोकांक जावपी त्रास पयस जातले.
खूबशीं वर्सां ह्या रस्त्याची मागणी जायत आशिल्ली. आतां मुख्यमंत्री डॉ. प्रमोद सावंत हांच्या यत्नाक लागून ह्या रस्त्याक मूर्त स्वरूप प्राप्त जायत आशिल्ल्यान लोकांक मोटी थाकाय मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
