भांगरभूंय | प्रतिनिधी
वांगड्यांची पदाधिकार्यां आड पुलीस कागाळ
पणजीः रेव्होल्युशनरी गोवन्स पक्षा भितर (आरजीपी) पेटिल्ल्या उज्यांत आतां खर रुप घेतलां. आरजीपी विरेश बोरकार गटाच्या वांगड्यांनी आरजीपीचे पदाधिकारी विश्वेश नायक आनी अजय खोलकार हांचे आड अब्रू लुकसाण आनी पक्षाच्या निधींत जाल्ल्या गैरवेव्हाराचो आरोप करीत पणजी पुलीस स्टेशनांत कागाळ दाखल केल्या. तशेंच पक्षाचे भांडारी अजय खोलकार हांकां धाडिल्लें आरजीपीचे सरचिटणीस विश्वेश नायक हांचें एक चॅट उक्ताडार आयलां. निधीच्या गैरवापरा विशीं असंतोष उक्तावपी संभाशण तातूंत आसा.
आमदार बोरकार हांचे पीए लुसियो रोन्कोन आनी पक्षातल्यान काडिल्ले फुडारी सॅम नायक, डॅगली फर्नांडीस, मॅल्विन दासिल्वा हांणी पणजी पुलीस स्टेशनांत कागाळ नोंद केल्या. मंगळारा आरजीपीचे अजय खोलकार हांणी पक्षाचे आदले अध्यक्ष मनोज परब हांची भेट घेतिल्ली. हे फाटभूंयेर हें कोफुसांव परत तापलां.
कागाळ दाखल केले उपरांत उलयतना रोन्कोन हांणी सांगलें, १६ जुनाक आमच्या १० वांगड्यांक पक्षांतल्यान भायर मारले. पूण जेन्ना पक्षांतल्या भायर काडटा तेन्ना कारणां दाखयात नोटीस काडून स्पश्टीकरण मागचें आसता. मात ही प्रक्रीया करिनासतना आमकां बेकायदेशीर रितीन पक्षांतल्यान भायर काडल्यात.
आमी सगळे जाण पक्षा खातीर बलिदान दिलां आनी खुब कश्ट घेतल्यात. जेन्ना आमी अर्थीक स्थिती विशीं प्रस्न केल्यार तेन्ना ते दरेक फावट म्हणटा वेबसायटीचेर घालतले. साडे चार वर्सां जालीं जेन्ना आमी अर्थीक प्रस्ना विशीं उलयता तेन्ना केन्नाच उतर मेळना. सगले वेबसायटीचेर मेळटले अशें सांगतात. पूण आजून मेरेन ना उत्तर मेळूंक नाशिल्ल्यान परत प्रस्न केल्यार तांणी तांत्रीक त्रुटींक लागून मार्चान वेबसायटूच बंद उडयली. आतां जुलयांत पावले अजूनय आमची वॅबसायट चलना, असो आरोप रोन्कोन हांणी केलो.
हें कोफुसांव सुरू जाल्लें तेन्ना विश्वेश नायक हांणी सगळ्या मिडीयाक एक व्हॉट्स ऍप मेसेज धाडून म्हजें नांव घेवन रोन्कोन सयत आदीत्य देसाय हांणी आरजीपी पक्ष काबार केला असो आरोप केलो. विश्वेशान खंयच्या आदारार ही मॅसेज घाली. कसलोच पुरावो नासतना उलयत जाल्यार ही अब्रु लुकसाणेचो गुन्यांव थारता, असो दावो रोन्कोन हांणी केलो.
म्हजेर आरोप केल्ले उपरांत ल्हव ल्हव जे १० वांगडी तांकां जापो विचारताले तांकांय दोश दिवपाक लागले. हालींच विरेश बोरकार हांचेर आरोप करून तांकां गद्दार लेगीत म्हणटलो. जे पदाधिकारी प्रस्न विचारतात तशेंच जापसालदारकी वा पारदर्शकताय मागतात तांचें हें नांव पिड्ड्यार करपाक सोदतात, असोय आरोप रोन्कोन हांणी केलो.
हे कोफुसांव भितरले भितर काबार करपाक जाय आसलें. मात आमच्याच पदाधिकार्यांनी हें कोफुसांव उक्ताडार हाडला. आतां आमकां दिसता भायर सावन आतां लढो दिवचो पडटलो. आमचे बरे मागपी आनी समर्थकांनीय तांकां प्रस्न करचे. हो पक्ष दोग तीग जाणांनी उबो करूंक ना, तर दरेका वांगड्यान घडयला. मात सद्या दोग- तीग वांगडी हें पक्ष चलयतात, अशी टिका रोन्कोन हांणी केल्या.
चॅट व्हायरल
आरजीपीचे सरचिटणीस विश्वेश नायक हांचें एक चॅट उक्तडार आयलां. तातूंत एक वांगडी तांणी पक्षाच्या फंडांत दिल्ल्या १ लाख रुपयांच्या योगदानाचो ते हिशोब नायक हांकां विचारतात. तातूंत नायक म्हणटात, तांणी हो हिशेब पक्षाचे भांडारी अजय खोलकार हांकां विचारचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
