भांगरभूंय | प्रतिनिधी
कुंदन फळारी: दिवचलच्या ग्रंथालयांत गिमाळ्या शिबिराचो समारोप
दिवचल: आयच्या काळांत शिक्षणाक व्हड म्हत्व आसा. भुरग्यांनी शिक्षणा वांगडा छंद आपणायलो जाल्यार तांची जीण समृद्ध जातली. पालकांनी भुरग्यांक तांचे भितर आशिल्ले कलागूण ओळखून तांकां उर्बा दिवप गरजेचें. ताका लागून असल्या शिबिरांचें आयोजन करतात, अशें दिवचलचे नगराध्यक्ष कुंदन फळारी हांणी सांगलें.
दिवचल म्हाल ग्रंथालय आयोजीत गिमाळें शिबिराच्या उक्तावणाक ते उलयताले. ग्रंथालयाची ग्रंथपाल प्रभारी तेजा परब हांणी मानेस्तांक फुलांचो तुरो भेटोवन येवकार दिलो. दोन दिसांच्या ह्या शिबिरांत भुरगयांनी उमेदीन वांटो घेतलो.
प्रा. मुकुंद माळगांवकार हांणी भुरग्यांक रांगोळी आनी निकीता गुप्ता हांणी वक्तृत्व कुशळटाय ह्या विशयाचेर मार्गदर्शन केलें. ह्यान पयलींच ग्रंथालयान गिमाळ्या शिबिराचें आयोजन केलां. करोनाक लागून हातूंत कांय वर्सां खंड पडलो. फुडें ही परंपरा अशीच चालूच दवरची अशें तांणी म्हणलें.
हे कार्यावळी खातीर कृष्णदास शामा ग्रंथालयाचे क्युरेटर डॉ. सुशांत तांडेल हांची उर्बा आनी मार्गदर्शन मेळ्ळें, अशें ग्रंथालयाची प्रभारी ग्रंथपाल तेजा परब हांणी सांगलें.
शिबिरांत रांगोळी आनी वक्तृत्व सर्तींत वांटो घेतिल्ल्या जैतिवंतांक इनामां भेटयलीं. ग्रंथपाल प्रगती पेडणेंकार हांणी उपकार मानले. ग्रंथपाल अस्मिता भिडे, सिध्दी भजे, प्रतिमा धामसेकार, स्मिता पाटील ह्या ग्रंथालयाच्या कर्मचार्यांनी ही कार्यावळ येसस्वी करपा खातीर योगदान दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
