भांगरभूंय | प्रतिनिधी
भारत आनी ऑस्ट्रेलिया ह्या पंगडां मदीं आयच्यान वन डे माळेक सुरवात जाता. पयली मॅच मुंबय जातली. वर्साचे अखेरेक भारतांत संवसारीक वन डे क्रिकेट सर्त जावपाची आसा. ताका लागून तयारी करपाचे दिश्टीन ही माळ दोनूय पंगडां खातीर म्हत्वाची आसा. तीन वन डे मॅचींचे माळेंत भारता मुखार साबार आव्हाना आसात.
सदचो मुखेली रोहित शर्मा आयचे मॅची खातीर उपलब्ध आसचो ना. कुटुंबीक कारणाक लागून ताणें सुटी घेतल्या. ताचे गैरहाजेरेंत हार्दिक पांड्या फुडारपण करतलो. दुसरे आनी तिसरे मॅची खातीर रोहित शर्मा उपलब्ध आसतलो.
भारताचोच न्हय जाल्यार ऑस्ट्रेलियेचो लेगीत मुखेली बदल्ला. सदचो मुखेली पॅट कमिन्साचे गैरहाजेरेंत स्टिवन स्मिथ ऑस्ट्रेलियेचें फुडारपण करतलो.
माळ सुरू जावपाक एक दीस बाकी आसतना भारताचो श्रेयस अय्यर जखमी जालो. ताचे सुवातेर निवड समितीन पर्यायी खेळगड्याची घोशणा करूंक ना.
सध्या वन डे रॅंकिंगेंत भारत पयले आनी ऑस्ट्रेलिया दुसरे सुवातेर आसा. पूण, दोगां मदीं फकत दोन गुणांचो फरक आसा. ताका लागून ऑस्ट्रेलिया माळ जिखलो जाल्यार तो पयले सुवातेर पावतलो.
दोनूय पंगडां मदीं आतां मेरेन 143 मॅची जाल्यात. हातूंतल्यो 80 मॅची ऑस्ट्रेलियेन आनी 53 भारतान जिखल्यात. भारतांत जाल्ल्या मॅचींचो विचार केलो जाल्यार दोनूय पंगडां मदीं 64 मॅची जाल्यात. हातूंतल्यो 30 मॅची ऑस्ट्रेलियेन आनी 29 मॅची भारतान जिखल्यात.
भारताचो ऑस्ट्रेलिये आड सर्वोच्च धांवसंख्या 383 आसा जाल्यार उणो स्कोर 63 आसा. जाल्यार ऑस्ट्रेलियेचो भारता आडचो सर्वोच्च स्कोर 389 आनी उणो स्कोर 101 आसा.
अहमदाबाद टॅस्ट मॅच सोडली जाल्यार सुरवातीच्या तिनूय मॅचींनी स्पिनरांनी आपलो शेक दवरिल्लो. पूण, वन डे माळे खातीर बॅट्समनांक मजत करपी खेळपट्ट्यो आसतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
