भांगरभूंय | प्रतिनिधी
येजमान भारत आनी इंग्लंड ह्या पंगडां मदीं आयच्यान हांगाच्या हिमाचल प्रदेश क्रिकेट असोसिएशन स्टेडियमाचेर पांचवी आनी निमाणी टॅस्ट मॅच सुरू जातली. भारत ही माळ पयलींच 3-1 अशा फरकान जिखल्या. पूण, आयची मॅच जिखून इंग्लंडाचेर आपलो शेक दवरपाचो यत्न करतलो.
भारताचो फास्ट बॉलर जसप्रीत बुमरा हे मॅची वरवीं पुनरागमन करतलो. चवथे टॅस्टींत ताका विसव दिल्लो. जाल्यार माळेंत अपेशी थारिल्ल्या रजत पाटीदाराचे सुवातेर देवदत्त पड्डिकलाक पदार्पणाची संद मेळुये.
दोनूय पंगडां मदीं अजून मेरेन 135 टॅस्टी जाल्यात. हातूंतल्यो 51 मॅची इंग्लंडान जाल्यार 34 मॅची भारतान जिखल्यात. भारतांत 68 मॅची जाल्यात. हातूंतल्यो 25 मॅची भारतान जिखल्यात, जाल्यार 15 मॅचींनी हार घेतल्या. 28 मॅची बादाबाद उरल्यात.
भारतान हैदराबादांत जाल्ली पयली मॅच हारल्या उपरांत उत्कृश्ट रितीन पुनरागमन केलें. विशाखापट्टणमांत जाल्ली दुसरी टॅस्ट उमळशीक वाडोवपी थारिल्ली. ही मॅच भारतान जिखून माळेंत 1-1 अशी बरोबरी केल्ली. ते उपरांत राजकोटांत जाल्ली मॅच भारतान 106 धांवड्यांनी सहज जिखिल्ली, जाल्यार रांची टॅस्टींत भारतान पांच विकेटींनी जैत जोडून माळ आपल्या नांवार केल्ली.
भारताचो युवा बॅट्समन यशस्वी जयस्वालान माळेंत सगल्यांत चड धांवड्यो केल्यात. जाल्यार जसप्रीत बुमरान सगल्यांत चड विकेटी मेळयल्यात.
दुसरे वटेन पयली मॅच जिखल्या उपरांत इंग्लंड फॉर्मांत दिसना. फाटल्यो तिनूय मॅच हारल्यात. इंग्लंडा वतीन ओपनर जॅक क्रॉलेन सगल्यांत चड धांवड्यो केल्यात. फाटल्या चार मॅचींनी तीन अर्द शेंकड्यां सयत 328 धांवड्यो केल्यात. जाल्यार टॉम हार्टलेन सगल्यांत चड विकेटी घेतल्यात.
धर्मशालाची खेळपट्टी फास्ट बॉलरांक चड मजत करता. ह्या मैदानाचेर अजून मेरेन 20 आंतरराष्ट्रीय मॅची जाल्यात. हातूंत 61.69 टक्के विकेटी ह्यो फास्ट बॉलरांनी घेतल्यात. स्पिनरांक 248तल्यो फकत 95 विकेटी मेळ्ळ्यात. ताका लागून दोनूय पंगड एक अतिरिक्त फास्ट बॉलर खेळोवपाची शक्यताय आसा. धर्मशालांत अजून मेरेन फकत एकूच टॅस्ट मॅच जाल्या. ती मॅच भारतान जिखिल्ली. 2017त भारत आनी ऑस्ट्रेलिया ह्या पंगडां मदीं ही मॅच जाल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
