भांगरभूंय | प्रतिनिधी
भांगरभूंय । प्रतिनिधी
सांगेंः मुख्यमंत्री डॉ प्रमोद सावंत हे फाटल्या 5 ऑक्टोबराक सांग्यार आयिल्ले तेन्ना जमाव बंदीच्या 144 कलमाचो भंग केल्ले खातीर सांगें पुलिसांनी आयआयटी विरोधां आड गुन्यांव नोंद केल्लो. सांगे तालुको उपजिल्होधिकारी आनी दंडाधिकारी आश्विन चंद्रू हांणी पुलिसांचो व्हो दावो भायरायलो. सांगें पुलिसांनी सारकी बाजू मांडली ना तशेंच केल्ल्या आरोपांत तथ्य ना अशें आपल्या निरीक्षणांत नमूद केलां. न्याय दंडाधिकाऱ्याच्या न्यायालयांत आयआयटी विरोधकांची बाजू अॅड स्टेनली रॉड्रिग्ज हांणी मांडली.
आयआयटी विरोधक मुख्यमंत्र्यांक काळे बावटे दाखयतले अशी खबर मेळिल्ल्यान पुलिसांनी 144 कलमाचो भंग केल्ल्याचो गुन्यांव तांचेर नोंद केल्लो. आयआयटीक विरोध करपी शेतकारांक सतावपा खातीर पुलिसांनी फटीच्या म्हायतीच्या आदारान तांचे गुन्यांव नोंद केल्लो. मात तांचो हो यत्न अपेशी थारलो अशें अॅड रॉड्रिग्ज हांणी सांगलें. न्याय दंडाधिकाऱ्यान दिल्ल्या निकाला विशीं आमी समाधानी आसात अशें तांणे सांगलें.
व्हो निकाल म्हणल्यार सताचें जैत आसा. राजकी चेंपणाक लागून शेतकारांक जमाव बंदी हुकूमाच्या नांवां खाला आडावपाचो पुलिसांनी केल्लो यत्न फळादीक जावपाक शकलो ना. पुलिसांनी आपली अब्रू राखपा खातीर फावो त्या मार्गान तपास करपाची गरज आसा अशें जोजफ फर्नांडीस हांणी सांगलें. आयआयटीक विरोध करपी शेतकारां आड फटीच्या कागाळी नोंद करतात. हाच्याय फुडें तें चलतलें. आमी भियेतले अशें कोणाक दिसता जाल्यार तो तांचो गैरसमज अशें मिल्टन फर्नांडीस हाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
