भांगरभूंय | प्रतिनिधी
भारतीय जनता पार्टीक आतां फकत अरविंद केजरीवाल हांचो आम आदमी पक्षूच टक्कर दिवपाक शकता, अशें चित्र देशांत सगळे कडेन काल पयर मेरेन तयार जाल्ल्याचें दिसतालें. पूण ह्या पक्षाची गाडी हेर विरोधी पक्षांच्या गाडयां भशेन रुळां वयल्यान बरीच निसरली आनी तांचो थारायल्लो प्रवास आतां तांकां जाय तसो जावचो ना, अशी शक्यताय तयार जाल्या. दिल्ली म्हापालिका वेंचणुकेंतल्या दिग्विजया उपरांत जाल्यार आम आदमी पक्षा कडेन नवी राजकी शक्त म्हणून पळयताले, मात दिल्लींतलो कथीत सोरो घोटाळ्यांत नाका मेरेन बुडिल्ल्यान अरविंद केजरीवाल आनी तांच्या पक्षाक तातूंतल्यान साल्वार जावपाक बरोच वेळ लागतलो, अशें म्हणलें तरी तो वेळ पासार जाय मेरेन आनीक पांच- स राज्यांतल्यो विधानसभा वेंचणुको आनी फुडली लोकसभा वेंचणूक लेगीत जावन गेल्ली आसतली. देखून फकत हात चोळीत बसपाची पाळी तांचेर येवपाक शकता. सोऱ्याच्या वेसनाक लागून एकाद्र्याच्या संवसाराचो गोबर जावपाची जायतीं प्रकरणां वा उदाहरणां आमच्या सामकार आसात. मात विशिश्ट कारणा खातीर सरकारान सोऱ्या विशींच्या धोरणाची फाटपुरवण केल्ल्यान ‘आप’ सारक्या एका राजकी पक्षाच्या सुमार धा वर्सांच्या सुखाच्या संवसारांत चक्रीवादळ तयार जावचें आनी ताका तोंड दितना पक्षाच्या फुडाऱ्यांक कोणाय सामकार लाचार जावपाची पाळी येवची हो त्या पक्षाचेर घडये नियतीन घेतिल्लो सूड म्हणपाक जाता. फाटल्या चार- पांच वर्सांत केजरीवाल आनी तांच्या आम आदमी पक्षान आपलो स्वताचो असो वेगळो मार्ग देशाच्या राजकारणांत आपणावन हेर सगल्या ‘बदनाम’ विरोधी पक्षाचें तुळेंत स्वताची अशी वेगळी राजकी वळख तयार केल्ली. मात कोट्यांनी रुपयांच्या सोऱ्या घोटाळ्यान ‘आप’ म्हत्वाकांक्षेक नेटान ब्रेक लागपाचो वेळ आतां आयला.
भश्टाचार विरोधी लोक आंदोलनांतल्या स्थापन जाल्ल्या आम आम आदमी पक्षान आनी त्या पक्षाच्या फुडाऱ्यांक भ्रश्टाचाराच्या प्रकरणांनीच पुराय रेवाडो घाल्लो आसा आनी मनिष सिसोदिया हांचे सारको फुडारी सध्या तिहार बंदखणीत वचून बसला. सत्येन जैन आसूं वा अजून कांय फुडारीय बंदखणीची वारें खाताशिल्ले तरी मनिष सिसोदिया बंदखणींत गेल्ल्यान स्वता अरविंद केजरीवाल आनी तांचो पक्ष पुराय लवंडला आनी तातूंतल्यान साल्वार जावप वा फुडले वेंचणुकेंत भारतीय जनता पक्षा सामकार आव्हान तयार करप हे तांचे खातीर अशक्य थारपाक शकता. सिसोदिया कडेन दिल्ली सोपोवन देशांत दिग्विजयाचे मोहिमेचेर वचपाचे तयारेंत आशिल्ल्या केजरीवाल हांची सोरो घोटाळ्यांतल्या घडणुकांनी सामकी कोंयडी जाल्या आनी रोखडेंच हें प्रकरण ताच्याय आंगार येवचें ना अशेय छातेर हात मारून म्हणपाक मेळचेंना. सिसोदिया हाका सीबीआय आनी ईडीन केल्ली अटक ही राजकी आशिल्ल्याचें अरविंद केजरीवालान आतां कितलेय हड्डें बडोवन सांगलें तरी एकूण प्रकरण तितलें सादें- सोपें ना हे आतां पुराय देशाक लेगीत कळ्ळां. आनी आम आदमी खातीर तोच तांचेर आतां मेरेनचो सगल्यात व्हडलो धपको थारतलो. ममता बॅनर्जी, लालू यादव, तेजस्वी यादव, अनिल देशमुख, संजय राऊत अशे जायते फुडारी सध्या ज्या व्हिक्टिम कार्डाचो उपेग करून केंद्रांतल्या भाजप सरकाराचेर नाका ते आरोप करून सुटल्यात तांच्या सूरांत सूर मेळोवन ‘आप’ चेर आजय तांचे माचयेचो वांटो जावपाचो वेळ येवप हें खरेंच दुर्दैवी आसा.
पयर दिल्लींत बायल आरक्षणाचे मागणे खातीर एक फार्स घडोवन हाडलो. निमित्त आशिल्लें अर्थातूच विरोधी पक्षांच्या विरोधी एकवटाचें. मात तो ल्हिपल्लो अजेंडा आशिल्लो. आम आदमीच्या फुडाऱ्यांनी थंय लेगीत हाजेरी लावून आतां एकसुरेपणान भाजपा आड लडपाची ताकद आमचे कडेन उरिल्ली ना हेंच दाखोवन दिलें. लोकसभेची वेंचणूक आंता वर्सान जातली. भाजप विरोधांत फकत आम आदमी पक्षूच थेट टक्कर दिवपाक शकता अशें काल- पयर मेरेन पोट तिडकेन सांगपी अरविंद केजरीवाल हांचें अवसान सोऱ्या घोटाळ्याक लागून सध्या बरेंच गळसणलां अशें दिसता. राहुल गांधी हाचें अस्तित्व जाल्यार आतां शून्य जाल्ल्यान मोदी आड केजरीवाल अशी लढत आशिल्ल्याचें दाखोवपाचोय यत्न जालो, मात खंयचे खंय कितें जावन आम आदमी पक्ष आनी हेर विरोधी पक्ष हातूंत कांय वेगळो फरक आसा अशें दिसना. सोऱ्या घोटाळ्यांतल्यान आम आदमी पक्ष तकली वयर काडपाक शकतलो अशें कोणाकूय दिसना. गुजरात वेंचणुके उपरांत एक राष्ट्रीय पक्ष म्हणून मान्यताय मेळिल्ल्या आम आदमी पक्षा खातीर फुडलो प्रवास आतां बरोच कुस्तार थारपाक शकता. दिल्लींतल्या घडणुकांक लागून जायत्या राज्यांतलें पक्षाच्या विस्ताराचें काम लेगीत आडकून पडिल्ल्याचें दिसता. अरविंद केजरीवाल जाल्यार सध्या निर्धास्तपणान दिल्ली सोडपाक शकनात. सोऱ्या घोटाळ्यांत केजरीवाल हेय सीबीआयआनी ईडीच्या रडाराचेर आसा आनी आपली कातडी पयलीं वाटावपा खातीर तांकां दिल्ली सोडून उपकारना.
भाजपा खातीर जाल्यार केजरीवालाक दिल्लींत चडांत चड वेळ आडोवन दवरप हिताचें थारपाचें आशिल्ल्यान तांचे कडल्यान ह्यो खेळी खेळपाचें चलतलेंच, भाजपाक सद्या लागींचो प्रतिस्पर्धी असो राजकी पक्ष उरिल्लो ना. विरोधी पक्षांच्या एकवटांत सतराशीं विघ्नां येतात आनी भाजपाक ताची खोस जावप सभावीक आसा. तातूंत आम आदमीचो देशांत जावपाक घाल्लो स्वैर संचार ह्या ना त्या कारणांक लागून थांबला. कर्नाटक, मध्यप्रदेश, राजस्थान ह्या राज्यांनी जावपी विधानसभा वेंचणुकांनी देंवप काय फकत लोकसभा वेंचणुकेचेर लक्ष केंद्रीत करप हाचेरूय अरविंद केजरीवाल हांकां आतांच निर्णय घेवचो पडटलो. सोऱ्या घोटाळ्यान आम आदमी पक्षाचे विस्वासार्हतेक व्हडली वेर पडल्या, हातूंत वाद ना. मात फुडाराक केजरीवाल हातूंतल्यान कसलो मार्ग काडटा हाचेर अर्थांतूच सगल्याचें लक्ष लागलां. हेर विरोधी पक्षांनी आतां केजरीवाल हांच्या सामकार हात फुडें केल्यार तें तांच्या पक्षा खातीर घातक थारपाक शकता. तें म्हागटबंदन नासल्यार ‘म्हाठगबंदन ‘ थारतलें अशेंय म्हणटात. आम आदमी पक्षाच्या वाडटे म्हत्वाकांक्षेक ब्रेक तर लागतलोच पूण तातूंतल्यान नवी खंयचीं समीकरणा तयार जातात हे लागींच्या फुडारांत दिसतलें.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
